Chief Minister Pu Lal Thanhawla chuan nimin khan Aizawl chhuahsanin Hrangturzo Assembly bial tlawha fang turin a zin chhuak a. Nimin vek khan Khawlailung, Chekawn, Lungchhuan leh North Vanlaiphai ah te amah chu mipui ten lo lawmin, vantlang inkhawm an neihpui a ni.

Chief Minister Pu Lal Thanhawla chuan Hrangturzo bial fanga a zin chhuahna hi  Inthlan hnua Sawrkar thar hnuaia Zokhaw lam a tlawhna programme hmasaber anih thu sawiin, Hrangturzo bial mipuiin amah chu hneh taka an thlan tling avangin a chhungte leh party aiawhin bial mipuite hnenah lawmthi a sawi a. Ram danpuiin  bial pahniha MLA nihkawp a phalloh avangin a tlinna bial pakhat zawk chu chhuahsan a tul dawn a sawi a. A bial chhuahsan tur emaw, bial a vil zui tur emaw chu ama mimal duhthlanna ni loa, party in uluk taka an ngaituah hnua Hrangturzo chu chhuahsan zawk se tia  ruahmanna an siam thu a sawi a. Pu Lal Thanhawla chuan Hrangturzo bial a chhuahsan tur chu pawi a tih thu sawiin, party mi a ni a, party thuhnuaia awm a nih angin ding tura an tihna ah te chuan hei leh chen hi duhthlanna pakhat mah nei lovin a lo din thin tawh thu a sawi a ni.

Khawilailungah chuan NLUP chungchang sawiin Chief Minister chuan NLUP chu mirethei, hmeithai, pachhia leh chhumchhia ten lei rem an rah ve theihna atana eizawnna ngelnghet an neih theihna tura duan a nih thu sawiin, a nihna tur ang taka dik taka hman tur ani a ti a, a hmang diklo te chu pek zui an ni lovang a ti. A nilo zawng an hmang anih chuan a hmang diklo te chu Pathian pawhin a hawisan a rin thu a sawi a ni.

Chekawn khuaah Pu Lal Thanhawla chuan intodelhna chungchang sawiin hnam intodelh chu hnam zahawm leh ropui an ni thin a, ei leh bar, sum leh pai lamahte kan intodelh theihna turin sawrkar chuan hma a la zel a ni a ti a, he intodelhna tura hmalaknate hi sawrkar emaw, kohhran emaw, tlawmngai pawl te emaw mawh a ni lova, kan zavai mawhphurna theuh a ni a ti a. MW 60 pechhuak thei Turial Hydel Project hnTHwh mek chu kumin kum tawp emaw, nakum kum tir a hawn mai theih anih thu sawiin,, MW 460 pechhuak thei tur Chhimtuipui Hydel Project NTPC in hma an lak mek leh MW 210 pechhuak thei Tuivai Hydel Project te siam puitlin hunah chuan kawlpetha a intodelhna  mai piah lamah sawkar tan sum hnar tha tak, sum leh paia intodelhna nasa takin a thlen ngei a rin thu a sawi bawk.

Lungchhuan vantlang inkhawm ah Chief Minister chuan Mizote chu Pathianin A zawnchhuah hnam kan ni a, khawvel a Chanchin Tha hril turin Mizo hnam hi A thlang a, chanchin tha hril a A duhdan anga kan awm chuan chimrala kan awm hi A phal lovang tih ka ring tlat ani a ti a. Lei hnuai hausakna chu Pathianin A hnam thlan te tana an hnam zahawmna leh ropuina atan a dah sak ngei a rin thusawiin Chief Minister chuan lei hnuai hausakna, a bikin gas chu ngawrh taka a zawnchhuahna hna company ten an thawk mek a, Meidum leh Keifangah te chuan gas a awm tih finfiah ngei a ni tawh a, gas zawnchhuah hna Mizoram chhim lamah Reliance Company hnenah pek chu hma an lak har avangin tunhnai khan Sawrkar Laipui chuan an licence an cancel sak a, a thawktu midang zawn mek anih thu a sawi bawk.

North Vanlaiphaiah chuan Chief Minister Pu Lal Thanhawla chuan kuthnathawk kan ni emaw, sumdawng kan ni emaw, sawrkar hnathawk kan ni emaw, eng hna pawh thawk ila, kan hna thawh theuha kan rinawm leh kan tui a pawimawh bera, Ringtu kan nihna angin kan hna kaltlangin mite tana malsawmna nih kan tum a kan mawhphurna theuh ram leh hnam tan kan hlenchhuah a tul a ni, a ti.

Heng khuaah te hian Horticulture Minister Pu P C Lalthanliana, Health Minister Pu Lal Thanzara leh Law Commission Chairman Pu John Siamkunga te pawhin thu sawina hun an nei a ni.

Ruahman lawk ang chuan vawiin chawhnu hian Chief Minister hian Lungkawlh a tlawh ang.

Chief Minister hi a nupui Pi Lal Riliani, Horticulture Minister Pu P.C. Lalthanliana, Health Minister Pu Lal Thanzara, Mizoram Law Commission Chairman leh South Tuipui bialtu MLA ni bawk Pu John Siamkunga ten an tawiawm a. PHE leh P &E Secretary leh Engineer-in-Chief PWD ni bawk Pu Lianchungnunga, PHE Department E-in-C Pu Lalfanliana, Agriculture Department Director Dr. C. Lalzarliana, Horticulture Department Director Pu R Zotawna, Health Services Department Director Dr. K. Ropari, Rural Development Director Pu V Lalsangliana leh senior officers dang engemaw zat in an tawiawm bawk a ni.