Vawiin khan Chief Minister Pu Lal Thanhawla chuan Mizo Zirlai Pawl (MZP) General Headquarters buatsaih, High School Leaving Certificate (HSLC) Examination 2017 a Top Ten-a Mizo zirlai 13 tlingte chawimawina programme chu Lal Thanhawla Auditorium ah khuallin niin a hmanpui. 

Chief Minister Pu Lal Thanhawla chuan zirlai titha te, an hlawhtlinnaah a lawmpui tih sawiin tum (ambition) mumal tak neih chu hlawhtlinna bul ani tih hre renga tun atanga tum mumal tak neia lehkha zir turin a chah a. A bul tan that chu a chanve zo ang kan ni tia sawi hi hlawhtlinna kawng pawimawh tak ani a, a bul tan tha turin a tir atangin taihmakna, tumruhna leh teirei peihna te hi kan neih a ngai a ni, a ti. Tunlai khawvel thangchho mekah thiamna a san tawh avangin khawvel chu Global Village pakhat ang mai sawi a ni thin a, thiamna chitin mai reng a sang tawh a, khawvela thil thleng te hi kan kutah hum thei a awm a, hengte hi kan tana tangkai tur, kan tana tha kan hman thiam a tul a, chutih rualin hriat tlemna hi thil hlauhawm tak ani tih hi kan hriat a ngai bawk a, chuvangin  heng thiamna te hi eng hi nge kan tangkaipui thei tih kan chhut thiam a ngai a chutiang zawnga tan la turin ka chah duh che u a ni, a ti bawk. 

Zirna kawngah Sawrkarin zirna tha (quality education) leh ram pawna thawnchhuah tlak zirna te (export quality) siam chu a tum ber a nih thusawiin Mizoramah industry leh corporate sector te kan nei lova, hna petu (job provider) lian ber chu Sawrkar a ni a, Sawrkar hnaah tute mah kan leng vek dawn lova chuvangin tun atanga ramchhung leh ram pawna kan zirlai te thawk turin in rilru inpuahchah a ngai a chutiang ram pawna thawk tlak ni turin in zir a ngai a ni, a ti. Zirlai te chu an nun fimkhurpui hle turah chahin ruihlo leh thil thalo laka insuma, mahni invenga, hengte hi hnar turin a fuih a. Bible ina a sawi Inngaihtlamna leh Lalpa tih man chu sum te, chawimawina te leh nunna te ani a tih chu hre reng turin a duh thu zirlai te a hrilh bawk a ni. 

Sawrkarin kawng hrang hrangin thalai leh zirlai te tan khawvel thar buatsaihin hma a lak mek thusawiin infiamna lamah phei chuan Hmarchhak a hmun hma nei tha pawl ber kan ni tawh a, theihtawp kan chhuah tlan chuan a dang zelah a tha lamah a ber kan ni thei a ni, a ti. All India Services leh Sipai officer a Mizo tlem zel chu a vei thusawiin hengte ngaituahin Sawrkarin Sainik School neih a tul a hriat avangin hma a lo la, naktip a he School hawn ani tur hian sipai a officer-a kan luhna tur kawng a hawn mai dawn bakah khua leh tui tha chherchhuahna kawng tha tak a dawn a, All India Civil Services ah Mizo kan tlin thei nan coaching class te hi Sawrkar in a ruahman mek a ni, a ti. 

Chief Minister hian zirlai titha te hi an kal zelna turah duhsakna hlanin MZP in citation leh thilpek an buatsaih te chu zirlai 13 hnenah a hlan a. MZP lam pawhin Chief Minister hi chawimawina an buatsaih an hlan bawka, tun thla ni 5 leh ni 6 a Bandarban Bangladesh a Zohnahtlak Bawn ten inkhawmpui an hman naah Chief Minister tana lawmpuina citation an siam pawh MZP hruaitu he khawmpui hmanga kal ten an lo hawn chu an hlan nghal bawk a ni. Chief Minister hi Bawm inkhawmpuiah khuallian atan sawm a ni a, a sawmna pawh a pawm a mahse rokhawlhna avangin a hmanpui thei ta lo a ni. 

Programme hi Pu B. Vanlaltana, Vice President, MZP, Gen. Hqrs in kaihruaiin Commissioner Lalngaihawmi, Territorial Commander Eastern Territory in hunserh a hmang a, Pu L. Ramdinliana Renthlei, General Secretary hnen atangin chawimawi programme an buatsaih chho dan report tlangpui ngaihthlak a ni. He hunah hian Pi T. Lalmuanpuii, Chairman Mizoram Cooperative Apex Bank leh Pu Lalsangzuala Ngente te pawhin fuihna thu an sawi bawk a ni. 

MZP Gen. Hqrs. hian kum 1995 atang khan hetiang chawimawina programme hi kumtin an buatsaih thin a ni.