Mamit District chhunga venhimna kalpui dan tur sawihoin vawiin khan DC Conference Hall, Mamitah Pi Lalbiaksangi District Bawrhsap hovin an thukhawm a. Mamit District chu sualna leh thil tha lo hrang hrang awm lova ralmuang taka a awm theihna tur kawng hrang hrang sawiho a ni. 

He thutkhawmnaah hian District Bawrhsap chuan Mamit District chu sualna hrang hrang, rukruk, tualthah, pawngsual etc laka a him theih nan venhimna lama thawktute chu khawtlang hruaitute leh tlawmngai pawlte thawhhopui thiam turin a chah a. Mi sual, Police-a Case nei tawhte chu an awmna chin leh an awmdan ngaihvena thlithlai reng turin a chah bawk. 

Mamit District chhunga venhimna tha taka a kal theih nan Mamit Town Area chhunga vengtinah DP din a, Mamit Police te nen thawkho turin he Meeting-ah hian rel a ni. 

District chhunga crime rate a san chuan District mualphona a nih avangin dan kengkawhtute chu tan la sauh sauh a, mi sual an mante case hlui an neih ang ang chhuichhuak a, roreltute hmaa thehluh tel thin nise, chu chuan mi sualte hremna turah roreltute a pui dawn a ni. 

Mamit District chhungah rukruk a hluar bik avangin thil ruk ni-a rinhlelhawm bungrua an zawrhte finfiah lova lei mai lo tur leh thil ruk leisaktute chu IPC Section 411 tlawhchhanin a rutu nen ang khat veka hrem theih a nih avangin hremna kan pumpelh a, Mamit District chhungah rukruk a lo tlem zawkna turin mi thil zawrh lei mai mai lo turin mipuite ngen nise tih a ni bawk.  

Vawiin Meeting-ah hian Mamit District chhunga venhimna kawnga thawktute bakah khawtlang hruaitute leh tlawmngai pawl hruaitute an tel a ni.