Department of Animal Husbandry & Veterinary (A.H. & Vety) chuan an Department staff te tha zawka hna an thawhho theihna tur leh ran vulha eizawngte hlawk zawka an tanpui theihna turin vawiin khan Conference Hall, Veterinary Polyclinic, Khatla ah Veterinary Field Officer-te tan ‘Workshop on Goal Setting and Entrepreneurship Development’ a buatsaih a. Finance Minister Pu Lalsawta chuan khuallian niin workshop hi a hmanpui. 

Pu Lalsawta chuan A.H. & Vety Department chu Mizoram ei leh bar, sum leh pai dinhmun hmasawn zel theihna atana Department pawimawh tak a ni, tiin Department hnathawktuten an tih tur leh mawhphurhna hlawhtling taka an hlen chhuak thin chu lawmawm a ti a. NEDP chungchang sawiin NEDP hnuaiah sawkar chu mipuite tana kawng kawhhmuhtu leh awlsamna siam saktu a ni a, mipui mamawh intawm – kawng, tharchhuah dah khawlna hmun leh khawl te chu sawrkarin a buaipui dawn a ni, a ti. NEDP laimu chu ‘tang puihna’ a ni tiin Finance Minister chuan Mizo te nunphung pangngaia bet tlat eichawp ngawr ngawr leh mamawh tawk chauh tharchhuah kalsanna tur leh tamzawk tharchhuah theihna turin duan a ni, a ti bawk. 

He hun hi A.H. & Vety Department Director Dr Saingura Sailo chuan kaihruaiin Department hmalakna leh hmachhawp hrang hrang kalkhawmte a hrilh a. ‘Workshop on Goal Setting and Entrepreneurship Development for Veterinary Field Officers’ ah hian ‘Goal Setting’ tih thupui hmangin ATI Associate Professor Pi Golda Dell Zohmangaihi chuan kalkhawmte a zirtir a, ‘Entrepreneuship and Animal Husbandry & Veterinary Services’ tih thupui hmangin U.N. Project Coordinator Pu Rinzuala chuan kalkhawmte a zirtir bawk a ni.