Vawiin khan I&PR Conference Hall Mamitah MZP Headquarters, Mamit leh District Child Protection tangkawpin an buatsaih HSLC Pass tharte lawmpuina leh Career Guidance Awareness Campaign neih a ni a. Pi Lalbiaksangi, District Bawrhsap chuan khuallian niin a hmanpui. 

Khuallian chuan thu sawiin, MZP Mamitin zirlai Pass tharte lawmpuina hun an buatsaih chu lawmawm a tih thu a sawi a. Zirlaite chu tum mumal tak nei a, chumi hlen tura taihmakna leh chhelna nen a zir turin a fuih. Tunlai khawvelah Sap tawng a pawimawh tawh avangin zirlaite chu Sap tawng hmang uar tur leh thiam ngei turin a chah a, zuk leh hmuam, ruihhlo tel lo a zirlai zir turin a fuih. Mamit District a zirlai Class  8-12 te tan  Air Force luh theihna tur Air Force lam hotute nen zirtirna hun buatsaih a nih dawn thu a sawi bawk. 

Tv. Lalropuia, President, MZP Headquarters Mamit pawhin thu sawiin, HSLC pass tharte chu a lawmpui thu leh an zir zelna turah duhsakna a hlan a. Zirlaite chu eng kawng pawh zawh se, mahni intodelh tura inbuatsaih tur leh an thiamna leh theihnate ram leh hnam tana hmang turin a fuih bawk a. Hun remchang hmasa berah HSLC leh HSSLC pass thate chawimawina neih a nih tur thu a sawi bawk. 

Vawiin Programme-ah hian Pu Micky R.Lalenkawla, District Project Co-ordinator, SSA Mission Mamit District in National Award for Innovation in Educational Administration, 2016-2017 a dawng thei chu MZP Headquarters Mamit chuan lawmpuiin chawimawina Citation a hlan bawk. 

He hun hi Nl.T.Lalrinfeli, Treasurer, MZP Headquarters Mamit chuan kaihruaiin, HSLC Pass tharte hi Pu Vanlalhmachhuana, MCS, SDC Mamit leh Dr.R.Lalrinhlua, District Child Protection Officer te’n an zir lehzelna tura tangkai zirtirna leh hrilhhriatna an nei a ni.