Vawiin chawhma khan Mizo Students’ Union (MSU) buatsaih HSSLC Zirlai Tithate Chawimawina, Vanapa Hall-ah neih a ni a. Home Minister Pu R.Lalzirliana chu khuallian a ni. 

Pu R.Lalzirliana chuan thu sawiin “Taimak hi hlawhtlinna bul a ni”, a ti a. Zirlai kalkhawmte hnenah chuan Mizoram tan an thiamna te hmang zel turin leh thawkrim turin a fuih a, an kal zelna turah duhsakna a hlan nghal a. Minister chuan intihbingna bansana, rilru  zau zawk pua thil thlir thiam tur leh Mizo tlawmngaihna chhawm nung zel turin zirlaite chu a chah a. Zirna chungchangah nu leh pa, zirtirtu te chuan mawhphurna sang tak an nei a ni, Home Minister chuan a ti a. Phailam zirna sang zawk bel tura kal tum zirlaite chu mizo nihna (identity) hloh lova kawng hrang hranga hmasawn zel turin leh thawh hreh nei lo turin a fuih bawk a ni. 

MSU hian zirlai tithate chawimawina hi kum 2006 atang khan an buatsaih tan a.He hunah hian Science, Commerce, Arts leh Vocational stream-a Mizo zirlai titha top 3 te chawimawi an ni. 

MSU Vice President, Pu Benjamin Lalnghaka Fanai chuan programme hi kaihruaiin MSU President, Pu RB. Lalmalsawma hnen atangin thusawi ngaihthlak a ni a. He hunah hian Aizawl FC President Pu Robert Romawia Royte chu chawimawina thilpek hlan niin thu a sawi bawk a. School hrang hrang atangin zirlaite an tel kim hle a ni.