Mizo Students Union in kumin 2012 a HSSLC a Mizo ti tha te chawimawina hun, vawiina Vanapa Halla a buatsaih ah, Chief Minister Pu Lal Thanhawla chuan hmanpuiin, chawimawina thilpekte a hlan.

Chief Minister chuan MSU in zirlai ti tha te hnena chawimawina hun a buatsaih chu tha a tih thu a sawi a.Chawimawina dawngtute chu hun lokal zel turah Pathian tih chunga tumruhna nen kal chho zel turin duhsakna a hlan a. Zirlai dang ten hei hi chonaah la a, ram leh hnam tana chhawr tlak ni turin theihtawp chhuah theuh turin a fuih nghal bawk a. Zirlai hruaitu pawlte chu zirlaite hmakhua an kalpui phawt chuan sorkar thlawpna an nei a ni a ti.

Chief Minister chuan zirlai ten hlawhtlinna nei tur leh, ram leh hnam hruaitu ni thei tur chuan nu leh pa leh zirtirtute thuawiha, aia upa te zah thiam a pawimawh a ni a ti a; tunlaiah zirlai zana mut nachang hrelo, zinga thawh nachang hre bawk silo tam tak an awm chu a pawi hle a ni a ti a. Sorkarin thalai te tan khawvel thar kawng hrang hrangah a siam sak mek thu sawiin, infiamna lam bakah zirlai chhawr tlak chherchhuah anih theihna turin Education Reforms Commission a din pawh hman thuai anih theihna turin sorkarin sum mamawh tur a dap mek a ni a ti a. Zirna hi eizawnna siam sak theitu leh hnathawh tur pawchhuak thei tur zawnga kalpui dan sorkarin a ngaihtuah chho mek reng a ni a ti.

Intodelhna chungchang a sawiah, Pu Lal Thanhawla chuan Mizo ten ei tur thla hnih daih pawh kan thar loh avangin thangtharte atang hian intodelh duhna thinlung kan neih a tul hle a ni a ti a. Hemi nei thei tur chuan taimakna leh tumruhna kan neih a tul a, chumi atan chuan hriselna tha kan neih angai a ni a ti. Chuvangin ei leh inah insum a, zuk leh hmuamah kan fihlim a, kan nitin nun kan vawn thianghlim angai hle a ni a ti. Ringtu kan nih angin, mihringte hnenah chauh nilo, Pathian thil siam zawng zawng hnenah chanchintha hrilh hi kan tih tur a ni tih kan hriat nawn fo a tul a ni a ti bawk.

Chawimawina hi Arts, Science leh Commerce streama ti tha pathumna thleng te hnenah hlan a ni a. Arts streamah hian R.Lalrinmawii, Govt Chaltlang HSS, Lalfakzuali, Home Mission School, Lalramdini Sailo, Synod HSS leh Loreta Lalruatpuii, Kawlkulh HSS te hnenah hlan a ni a. Science streamah St Paul’s HSS atangin Zairemliana Chenkual, Vanlalhruaii leh Malsawmkima Kullai te leh Benjamin Lalfakmawia, St.Peter’s HSS te hnenah hlan a ni bawk a. Commerce streamah Janet C.Rosemawii, Mimi Lalzarpuii leh Lalmuanzuali, Oikos HSS amite vek hnenah hlan a ni bawk a ni.

Hemi hunah hian 2012 a UPSC Exama hlawhtling Nula Lalrinpuii Hrahsel hnenah MSU hian chawimawina thilpek an hlan bawk a ni.