Vawiin chawhma dar 11:00 khan DC’s Coference Room, Saiha-ah District Bawrhsap Pu Kunal, IAS hovin Mizoram State Aids Control Society hotute nen meeting pawimawh neih ani.
He meeting ah hian District chhungah thisen test-na ICTC Centre-2 leh Mobile Test Centre 1 a awm thu report pek ani a, Saiha District ah HIV Positive hmuhchhuah tawh mipa 28 leh hmeichhia 21 an awm tawh thu report pek ani bawk. ART Center atanga damdawi la mek mi 18 an awm thu tarlan ani bawk. MSACS. chuan Aizawl khawpui tiam lovin Mizoram chhung District hrang hrang 7 ah AIDS dona leh Campaign beihpui thlak nan Rs.15,00,00/- pawisa pek an nih thu he meeting ah sawilan ani a, HIV hrikpai hi za zela 87.5 chu hmeichhiat mipat hman atanga inkai chhawn anih thu leh kum 15 leh kum 40 inkar miten HIV hrik hi an pai tlangpui thu sawilan ani bawk.
Saiha District chhunga HIV hrik darh zau zel tur dan dantur ngaihtuah in Saiha khawpui chhung School hrang hrang ah te Awareness Campaign neih nise tih rel ani a, he mi atan hian tlawmngaipawl hrang hrang te phungbawm ah sawmin Campaign hi neih nise tih rel anih bakah khawpui chhung Kohhran hrang hrang te pawh an Biak In-ah mipui te hnena Awareness Campaign nei tura ngen nise tih he meeting-ah hian rel ani bawk. He meeting rawn hmanpui tur hian Aizawl atangin Dr Vanlaldiki, Deputy Director, Mizoram State Aids Control Society hovin an lokal ani. Meeting ah hian Department hrang hrang hotu te, Tlawngai pawl hruaitu te leh Kohhran hruaitute an tel ani.
