Vawiin chawhma dar 9:30 khan Serchhip D.C. Meeting Room ah District Bawrhsap Pu P.Lalchhuanga kaihhruaina hnuaiah D.J. Research & Consultancy Pvt. Ltd. Managing Director Dr. Damodar Tripathy leh Serchhip District chhunga NLUP Line Department hrang hrang hotuten Inkawm hona hun an hmang a, NLUP kalpui mek chungchanga hmalakna te leh harsatna an tawh te an sawiho. D.J. Research & Consultancy Pvt. Ltd hi Mizoram sawrkarin NLUP kaltlanga hmalakna te endikpui tur (Third Party Monitoring) atana a rawih a ni.

Dr. Tripathy chuan NLUP hmalakna an endik kawngah thil kal fuh lo hlir chhuia dem tur zawnga thawkchhuak an nih loh thu sawiin, NLUP kalpui dan chungchangah Line Department ten harsatna an tawh te pawh hriatpuia a sutkian dan kawng ngaihtuahpui chu an thil tum anih tel thu a sawi a, IT oriented Management Information System chu sawrkarin kalpui a tum mek tih sawilangin data felfai leh quality tha he system kaltlang hian neih anih ngei a beisei thu a sawi bawk.

He hunah hian NLUP hmalakna a harsatna an tawh te Department hrang hrangin an sawi a, an harsatna tawh zingah hnathawh hun (working season) a pawisa hman tur a hun taka an hmu hmanlo thin chuan duh anga hna thawh chak a tih harsat thu leh thawktu indaihlohna (understaffed) bakah veivahna atana hman tur motor an neilo te chu an harsatna tawh lian zual te an nih thu an sawi a, beneficiary te zinga mi tlemte tanpuina sum an dawn hnu pawh a hma la tha duh lo, department leh monitoring committee ten hma la tura an hrilh pawha luhlul tlat an awm thin chu pawi an tih thu sawiin a thawk tha te zinga thenkhat chuan a hlawkna an tel tan der tawh thu an sawi bawk.

Dr. Tripathy chuan Line Department te chu E-mail kaltlang a an harsatna te leh an hmalakna leh hmasawnna te (thlalak telin) thawn thin turin a ngen a, an thlen chin leh hma chhawpte bakah an hmasawn dan te mipuite hnenah a tam thei ang ber hrilh thin turin a chah bawk.

District Bawhsap pawhin NLUP monitoring tehfung awmze nei leh felfai taka an kalpui thin dan Dr. Tripathy hi hrilhin NLUP beneficiary te chu an hnathawhna hmun ngeia kal a monitoring an tih thin thu leh an hmalaknate uluk taka an zir hnu a grading system hmanga an dinhmun an teh sak thin thu a sawi a, an grading azir hian beneficiary te chunga action lak anih thin thu a sawi bawk. Serchhip District chhunga NLUP Phase-I an kalpui dan leh an hmasawn dan te chipchiar taka ziakin Dr. Tripathy hi a hlan nghal baawk a ni.