Chief Minister Pu Lal Thanhawla’n Aizawl Football Club in ramchhung football inelna sang bera an Champion chu a lawmpui thu sawiin an hlawhtlinna chu Mizoram leh mipuite hlawhtlinna a ni a ti a. Mizoram leh mipui tan thil chhuanawm leh ropui tak a ni tiin an kal zelna turah duhsakna sang ber a hlan a.

He hnehna hian ramchhungah Mizoram leh Mizo thalai te theihna a pholang a, football ah a ber kan kai ta tiin a sawi theih ta a, he hnehna hian nasa leh zawkin football a chawisang zel dawn a, hriat pawh kan hlawh belh dawn a, footballer te tan kawng zau zawk leh hlawhtlinna nasa zawk a in hawn chhoh zel ka beisei a ti a. He hlawhtlinna an neih theih nana theihtawpa chhuaha inkhel AFC footballer-te leh Club enkawltu te, kawng hrang hranga an mahni tawiawmtu MFA hotute leh mipui mimir an mahni lo lawma phurpui te chunga lawmthu a sawi tel a. Programme duan lawk avanga vawiin tlaia Lammuala a lawmna programme ah a tel thei lo tur chu pawi a tih thu a sawi bawk.