78/2025-2026

Aizawl, the 8th April 2025: Vawiin khan Chief Minister Pu Lalduhoma chuan a office-ah IFAD Design team te a kawm a. Mizorama FOCUS 2.0 kalpui dan tur an ruahmanna te a enpui.

Chief Minister hian, FOCUS 2.0 atana an thil ruahmanah han belh deuh hlek tula a ngaih te a hrilh a, scheme dang nena kalkawptir (convergence) a that a rin thu pawh a hrilh. Hmalakna inbawhthuah (duplicacy) a awm loh nana department dangte nena inhre tawna kal (coordinated) a pawimawh thu leh thil thar chin chhuah (innovation) lama hmalak uar a thaa a hriat thu a sawi bawk.

Pu Piyush Kanal, Country Programme Analyst, IFAD & ICO chuan kum 2019 atanga bul tana, kum 2024 a tawp ta, FOCUS Mizoram district 6 a khaw 272 a cheng chhungkaw 55,000 te tana hma an lak dan tlangpui a tarlang hmasa a. An hmalakna zarah chhungkaw 41,888 te chuan sik leh sa inthlak tuar thei eizawnna (climate resilent practice) an thlang zui ta nia an hriat thu a sawi.

A thawhhnihna an kalpui tur FOCUS 2.0 an ruahmanna tlangpui hi Pi Alessandra Gage, Natural Resources Management Officer chuan a sawifiah a. Mizoram district 11 a RD Block 26 huama khaw 700 huapa kalpui an tum dan a tarlang. A Project Component pawimawh tak chu Market Access & Entreprenuership leh tharchhuah tihpun leh climate inthlak zel tuar thei chi thlai uar a ni a. Mizoram sawrkarin Zau Policy a kalpui tur nena kal tlang thei tura ngaih a ni. Tin, FOCUS 2.0 hi Bana Kaih nena inhne rual taka kalpui theih a nih thu a tarlang bawk.

IFAD Design team te hi Pi Lalengzami, Addl. Director, Agriculture & Farmers' Welfare, State Project Director, FOCUS leh FOCUS thawktu dang ten an tawiawm a ni.