77/2025-2026

Siaha the 7th April 2025: PWD Minister Pu Vanlalhlana chuan zanin dar 6:30 vel khan Siaha lo lutin District chhunga official thenkhat ten circuit house-ah an lo hmuak.

Pu Vanlalhlana hi Siaha District chhunga kawng sial hna thawh mek leh kawngpui dinhmun ena rawn zin a ni a, zanin Siaha ah riakin naktuk zing dar 6 ah Lawngtlai lam panin a chhuak leh dawn a ni.

Minister Pu Vanlalhlana chuan Siaha District mipuite hawihhawmna leh mikhual an dawngsawn dan chu ropui a tih thu a sawi a, rei an cham thei lo erawh chu pawi a ti hle tiin District chhunga kawng dinhmun fiah fai zawka en turin rawn zin leh ngei a tum tih a sawi. PWD chu Department pawimawh tak a ni a, Kawng siam bakah Building sak te, Lei dawh te leh project lian tak tak thawk thin an nih avangin fimkhur tak leh ram hmangaihna tak tak nena thawh a pawimawh a ti. Kawngpui siam ringawt a tawk lova, intlawhpawhna tha a awm theih nan tha taka enkawl zui a tul a, departmenta thawkte pawh tan lak a ngai nasa lehzual tiin theihtawp chhuah theuh turin thawktute a fuih bawk a ni.

Minister hmuahna programme tawi Circuit house-a buatsaihah District Bawrhsap Pu VL Hruaizela Khiangte chuan Minister in Siaha a lo tlawh chu lawmawm a tih thu a sawi a, District dinhmun tlangpui tarlanna neiin Minister leh amah lo tawiawmtute lawmna thu a sawi.

Minister hi Deputy Speaker Pu Lalfamkima, Lunglei W Bialtu MLA Pu T Lalhlimpuia bakah Er H Zoramliana, Engineer in chief (PWD) te, Er David Sapzova, Chief Engineer (Roads), Er Hrangthanga Zote, Chief Engineer (Building), Er Robin Lalrinawma, Chief Engineer ( Highway), Er Lalchhandami, Chief Architect (PWD) te leh official dangten an rawn tawiawm a. Siaha ah hian Bialtu MLA Dr K Beichhua hovin MADC CEM Pu M Laikaw leh a thawhpuite, Mizoram sawrkar official te leh party mi leh sa ten an lo hmuak a ni.