76/2025-2026

Dated : Mamit 7th of April, 2025 : Vawiin khan Pu B.Lalchhanzova, Minister, Food & Civil Supplies, Consumer Affairs, Land Revenue & Settlement chuan Tripura atanga Gas pipe line hmanga Mizoram gas chawk luhna tura hnathawktu Indradhanush Gas Grid Limited (IGGL) leh Tripura Natural Gas Company Limited (TNGCL) Company-te DC Conference Hall, Mamit-ah meeting a neihpui.

Pu B. Lalchhanzova chuan Tripura Panisagar atanga leihnuai Gas Pipe line hmanga Mizorama gas lakluhna tura hnathawh mek thlen chin leh hmachhawp awmte a chhawrtu tur mipui kan nih angin kan ngaihven a, chak taka hna a kal theihna tura kan theihna zawn theuha ngaihtuahna kan sen a tul thu a sawi a, gas pipe line hmanga gas lakluhna turah hian Mizoram chu tlangram a nih avangin leimin lakah te a him ngei em tihte chu a thawktu company-te chiang taka zawh niin, gas lakluh tur hi In tinah Electric kan chhit anga lak tur hi a ni a, tuna kan gas hman lai aia zang daih a nih dawn avang leh a pipe hi thir tha tak hman tur a nih avangin leak/put theilo tura duan a ni a, thil hlauhawm a awm dawn loh thu mipui te'n kan hriat a tul a, tuna gas kan hman lai aia man tlawm zawka kan hmang thei tur chu hmasawnna lawmawm tak a nih thu a sawi.

Minister chuan gas pipe line hna chak leh tluang taka thawh a nih theih nan Mamit District Bawrhsap, FCS&CA, Commerce & Industries Department-te bakah Pipe line kalkawnga harsatna awm thei tur kawng lam enkawltu PWD te nen thlatin review meeting neih thin tum a nih thu sawiin he hna kalpuina kawngah hian Sawrkar chuan theihtawp a chhuah dawn a ni a ti.

Gas pipe line hi Tripura Panisagar atanga Sihmui thlengin 104 kms tur a ni a, 100 kms hi Mamit District chhunga kaltlang tur a ni. Hna zawh hun atan hian 31st March, 2027 chu ruahman a ni a, tunah hian 23.148 kms a thui pipe hi phum tawh a ni. Gas pipe line hi Tripura sawrkar hnuaiah kum 1990 atanga kalpui a lo ni tawh a. Tripura atanga Mizorama lakluhna hna hi Indradhanush Gas Grid Limited te'n an thawk anga, Mizoram chhunga In tina connention pek hna hi Tripura Natural Gas Company Limited te'n an thawk thung ang.

Vawiin hian IGGL leh TNGGL Company atangin gas pipe line kalpuina tura hriattur hrang hrangte a lem nen entirna neih a ni a, he mi chungchang hi Officials te nen sawiho zuina neih a ni bawk.

Gas pipe line hna chungchang sawihona hi Pu K.Laltlawmlova, Diatrict Bawrhsap chuan kaihruaiin, FCS & CA Secretary leh Director bakah SP, Mamit, Mamit khawpui chhunga sawrkar Officials te leh Campany lama thawktute an tel a ni.

Pu B.Lalchhanzova Minister hian Mamit Chhimlama Gas pipe line hna kal mek chu a hmunah a tlawh bakah Land & Revenue Department leh Food & Civil Supplies Office- te  tlawhin thawktute nen inkawmhona an nei a ni.