Indian Medical Association, Mizoram Branch General Conference vawi 35-na, vawiina Tourist Lodge, Chaltlanga neihah Chief Minister Pu Lal Thanhawla chuan a hmanpui.

Chief Minister chuan Mizoram mipui ten hriselna ngaihpawimawh nachang kan hriat deuh deuh theih nan doctorte ngei hi hmala tu tur in ni a ti a. National Rural Health Mission in hlawhtlinna tha a hmuh theih nan, neitu rilru pu chunga tun aia nasa zawka an inpek a tula ni a ti a. Eng hna pawh thawk ila, ringtu kan nihna hi rim taka kan hman chuan hlawhtlinna duhawm kan hmu thei a ni a ti.

Chief Minister chuan India in independent a hmuh tirh atanga a ngaihpawimawh berte chu zirna leh hriselna lam hi a ni tiin, Mizote hi kristian za a za inti si hriselna lamah kan hniam hle a ni a ti a. Chuvangin mipuite hriselna lam enkawltu, doctorte chu mipuite entawntlaka hna thawk turin a chah a. An hnathawhna hmunte pawh hnathawhna nuam leh tha an neih theih nan sorkarin theihtawp a chhuah thu a sawi a. Mipui, a bikin thingtlang mipui te hnenah hmasawn tur chuan hriselna tha neih a tul hmasak ber thu tlangau pui thin turin a chah a. Mi taima, mahse hriselna tha nei silo chuan hna a thawk tak tak theilo a ni a ti. Chuvangin doctor te ngei hian hma in hruai thiam a tul a ni a ti.

Indian Medical Association (IMA) hi kum 1928 khan din a niin tunah hian member nuai 7 chuang an awm a. IMA Mizoram Branch hi kum 1972 khan din leh a ni a, tunah hian member 593 an awm mek a ni. IMA ah hian doctor chi hrang hrang - Medical, Dental leh Ayush te an inthlung khawm vek a. Sorkar hnuaia thawkte, Private a thawkte leh sipai leh paramilitary force ami te a huap vekin, pension tawhte pawh member an ni.

Vawiina Conference ah hian agenda an neih, Consultation Fee ah MBBS passed thar ten Rs.100, Specialist passed thar ten Rs.150 leh Specialists kum 5 aia tam thawk tawh ten Rs.200 nise tih chu an passed a. Hei bakah hian Mizoram Clinical Establishment Rules,2010 leh Quackery & Anti Quackery (doctor lem chungchang) te pawh an passed bawk a ni.

Conference hawnna inkhawm hi IMA Mizoram Branch President Dr. Lalbiak Kima’n a kaihruai a ni.