Nimin khan Ropuiliani Hall Hnahthial-ah Mizoram Apex Handloom & Handicraft Cooperative Society Ltd. buatsaih in Handloom Expo neih a ni, Pu R. Rohnuna, MCS, SDO (Civil) chu khuallian niin a hawng.

Pu K. Rothawmliana, Manager MAHCO Ltd in a kaihhruai a thuhma sawiin tuna an Expo hi Ministry of Textile Govt. of India bultuma neih a nih thu a sawi a, tun tum-ah hian firm 10 in stall an hawn tur thu sawiin handloom hi Mizoram-a industry thangchhak ber a nih te, tunhma chuan Manipui atanga puan lakluh a nih thin thu leh hei hi MAHCOchuan ngaimawh a, Mizoram tual tah ngei zawrh chhuah theih dan tur kawng a dap thin thu a sawi a, tunah chuan MAHCO in a enkawl zawh tawh loh handloom kan rama a lo awm ta hi a lawmawm hle a, Thenzawl larna chhan pakhat pawh handloom lama an thanharh hma vang a nih thu leh Handloom enkawl tur hian lehkha thiam a ngai lova, tu tan pawh bul tan theih a nih thu a sawi bawk a ni.

Khuallian Pu R. Rohnuna pawhin hawnna thu sawiin, MAHCO in Handloom Expo Hnahthial-a a rawn buatsaih thei chu lawmawm a tih thu te, Mizote hi NE state zing-ah pawh rilru seng nasa ber kan ni a tih theih ang, kan pi leh pu te atanga puan nalh tak tak nei chho kan ni a,pawnpui te phei chu a hlu lehzual hle a ni, hetianga kan pi leh pute zia lang chhuak thei puan thatak leh thil siam chhuah tha tak tak phochhuah theih a ni hi Mizote a bik takin Hnahthial thalaite tanchona a ni a, kan thalaite rilruleh eizawnna an hmuh theih phahna Expo lo ni thei se a duh thu uar takin a sawi a, dawr hawngtute leh Hnahthial mipui ten hlawkna ropui tak an chan theih nan duhsakna a hlan thu a sawi bawk a ni.

He hunah hian Hnahthial North VCP Pu C. Chalzama pawh thu a sawi a,Hnahthial North leh South VC member an kal tha hle a ni.

He Expo-a stall inhawng te chu : 1) Zonunsang Handloom & Handicraft, 2) Chhinga veng Handloom & Handicraft Cooperative Society, 3) Hani Handloom, 4) W.C. Handloom, 5) Zion Handicraft Cane & Bamboo, 6) GADA Handicraft, Edenthar, 7) MP Handloom, Ramhlun \\\'S\\\', 8) Bethlehem Vengthang Society, 9) Ramhlun Vengthar Handloom, 10) Damveng Hnadloom Cooperative Society te an ni.