2473/2022-2023
Aizawl, 28.10.2022: Chief Minister Pu Zoramthanga chuan vawiin khan Indian Medical Association: Mizoram State Branch in an Annual Conference 45-na, Aijal Club a buatsaih chu khuallian niin a hmanpui a. Kumin hi IMA Mizoram State Branch dincham kum 50 na a nih a, chumi puala Golden Jubilee Souvenir siam chu khuallian hian a tlangzarh bawk.

Mizorama doctor intelkhawm, IMA memberte bulah Chief Minister chuan doctor-te chu hna ropui tak thawk, an thiamna damna kawngah chuan kan lei pathian hmuhtheihte an nih thu a sawi a. Mizoram hi tisa ah a damna tura mipui kan inthlamuanna chu doctor- te an nih thu a sawi a. Chief Minister chuan state chhunga hriselna inenkawlna in hma a sawn zel theih nan kawng hrang hranga hma lak a nih dan sawiin, health infrastructure tih that te, medical college enkawl zui zel dan neih chungchanga sawrkar laipuia thu thlen te pawh sawiin, khawsak harsa zawkte inenkawlna engemawchen sawrkarin a phuhruk theih nan tia state health care scheme duanchhuah a nih dan a sawi a. Hun kal zela zau zawk huam a, scheme tha zawk a nih theih nana kawng zawn a nih dan te a tarlang a. Hmasawn belh zel theih nan sawrkar a tih tur tul kawng awm ang angte a dap dan tur sawiin, a hlawhtlinna tifamkim tura doctor te an pawimawh thu a sawi bawk. Chief Minister chuan doctor kalkhawmte chu an nihna leh thiamna hlutzia sawiin, a tul anga sorkara thurawn pe a, natna leh inenkawl dan chungchanga mipui hnena inhrilhriatna an lo pek thin te chu fakawm tiin, chhunzawm zel turin a duhsakna a hlan a ni.

IMA Mizoram Branch hi kum 1972 khan din a ni a. An chetchhuahna zingah kumin khan tum hnih Special Clinic Kawrtethawvengah leh East Lungdar ah buatsaihin, hengah hian a thlawn a damdawi sem chu cheng nuai kua chuang a tling a ni. Women Doctors Wing chuan MHIP Day pualin Phunchawngah hmeichhe tan Special clinic siamin, a thlawnin damlo 123 an en bawk.

IMA Annual Conference hi an President Dr. John Zohmingthanga chuan kaihruaiin kalkhawmte lawm a thu a sawi a. Hony Secretary Dr. Chawnglungmuana, Finance Secretary Dr. R. Lalduhawma leh auditor Dr. Lalrinfela te hnen atangin report ngaihthlak a ni a. Member kalta Dr. Thangchungnunga sunna hun neih a ni a, hruaitu hluite chawimawina hun neih ni bawkin, Dr. C. Lalhmingliana kaihhruaiin member ten rinawmna thu an tiam a. Treasurer Dr. Lalhuthangi Hmar chuan lawmthu sawiin hun a titawp a ni.