Vawiin tlai ah khan Chief Minister Pu Lal Thanhawla chuan Aijal Club ah doctor inzawmkhawm pawl lian, Indian Medical Association (IMA),Mizoram State Branch in Annual Conference vawi 38-na neih a hmanpui. IMA, Mizoram Branch ah hian doctor 694 te chu member nilai an ni a, heng zinga 42 hi life member an ni mek bawk a ni.

Doctor pawl lian AMA official programme a thusawitu,Chief Minister Pu Lal Thanhawla chuan, "Mizoram in State puitling kan nih kum 27-na kan hmang mek a ni a. Kawng tam takah hmasawnna chu a awm ngei a, kan inrelbawlna leh hmasawnna ruhrelte pawh a thang hle tih a hmuh theih a ni. Ziak leh chhiar lamah te pawh hma kan sawn a, vantlang hriselna thlengin hmasawnna hmuh tur a awm a ni. Amaherawhchu, duhthusam hmasawnna erawh kan la phaklo hle a. Kan theihna te tuaihriam a, kan chak lohna te inbihchian a pawimawh hle a ni. Sorkar chuan mipuite hamthatna tur leh kawng engkima hmasawnna hi a ngaipawimawh a ni", a ti a. Doctor te chu hriselna kawnga mipui zirtirna pe turin thiam bik nei an nih avangin mipui in an ring a, an thusawi te pawh an awi bik thin a ni a ti. Zuk leh hmuam, eitam luat bakah ruihlo ten hriselna a khawih chhiatdan te mipui hnenah nasa zawka zirtirna pe tur leh anmahni pawh entawn tlaka invawng thianghlim turin IMA member te chu a chah. Kum 38-na hmang mek tu, Indian Medical Association(IMA), Mizoram State Branch chu an hnathawh tawh leh hmasawnna te thlir leta tan lak ngaihna lai an neih te hmuchhuak tur leh nasa zawka thawk turin a ngen a. Chanchinbu pakhat in Aizawl ah specialist an tam uchuak bik a tih chu ngaihmawh awm hle a a hriat thu sawiin sawrkarin chinfel a tum ang a ti a. Aizawl khawpui ringawta awm tum lovin thingtlang lamah te pawh tha hnem ngaia awm tura inpe thei te hi doctor zingah hian awm thei se hriselna kawngah hma kan sawn nasa anga, infant mortality rate tih hniam nan tak pawh a sawt a rin thu a sawi a ni. Mipui hriselna hian ram a ti hmasawn thin tih sawrkarin a hriat avangin Health Sector pawh hi a dah pawimawh hle a, National Health Mission leh Nutrition programme pawh tun aia nasa zawka tan an lak a tul thu a sawiin naupang kum 3 chin a za-a-25 te lai mai eitur tha hmu zo lo an awm chu sawrkarin a ngaimawh hle a ni a ti. State pawna mite pawh in hriselna leh faina ah hma kan sawn em tih an chik thin a, faina chungchangah bik phei chuan hmasawnna tur kan la ngah a ni a ti. Airport leh Aizawl inkar a tawp lutuk te leh khualzin hmuha mawihnai lo kawngsira inbual, kawngsir zung, zurui bakah ual au taka meizu hmuh tur a tam thin chu a zahthlak thu a sawi a. Ram dang miten Mizo an hmuh dan a hniam phah ang tih a hlauhawm a, sawrkar in he kawngpui dung pawimawh tak hi a lo fai zawk nan ngaihtuahna a seng mek a ni a ti. Sawrkar laipuiin CLEAN INDIA CAMPAIGN rawn ngai pawimawh thar pawh chu lawmawma tih thu sawiin Mizoram pawh in a thlawp a ni a ti a. MILLENNIUM DEVELOPMENT GOAL, 2015 ah a hmawr bawk tur a ni a, India chuan INFANT MORTALITY LEH MATERNAL MORTALITY te hi a HMUN THUM A THENA HMUN 2-a ti hniam turin a intiam avangin Mizoram pawh in nasa taka tan a lak a ngaih thu a sawi a ni. "12th Five Year Plan kan hman mekah hian thawhchhuah awm tur zawnga hmala a, project pawimawh bikte uluk taka kalpui a ngai a. Ngaihpawimawh bik tura kan duhte zingah pawh: zirna, hriselna, ei tur tha leh tui thianghlim pek te; retheihna tih ziaawm a Rural Development Program kaltlanga thingtlang mite tana eizawnna buatsaih sak te an ni",Chief Minister Pu Lal Thanhawla chuan tiin hriselna leh zirna sawrkarin a dah pawimawh thu a tarlang a ni. Chief Minister hian Mizoram Economic Survey 2013-14 a Health Sector bik tarlang in · Health Sub Centres - 370, · Primary Health Centre (PHC) - 57, · Community Health Centre - 12 leh Hospital - 13 a awm a. · Naupang kum 3 chin a za-a-25 te chu eitur tha hmu zo lo (malnourish) an awm a. Nausen piang hlim thi, Infant Mortality Rate (IMR) hi SRS 2009 ang chuan 1000 ah 37 zel a ni a (Manipur-ah 12 leh Nagaland-ah 20). Doctor awmzat hi 1 is to 2455 leh Nurse awmzat hi 1 is to 1477 a ni. Chief Minister chuan," He doctor leh nurse indaih lohna phuhru turin Falkawna Mizoram Medical College & Research Centre tur pawh chak taka kalpui mek a ni a. Tin, Private Sector atangte a PPP Mode a Medical College din tura dilna rawn thehluhte pawh zirchian mek a ni", a ti a ni.

IMA, Mizoram state branch annual conference vawi 38-na official programme hi an pawl president Dr. Vanlalruata in kaihruai IMA annual report Dr.John Zohmingthanga Honorary Secretary in a pe a. He hunah hian an member fam tawh, Dr.John M. Ralte leh Dr.H.B.James te sunna hun hman a ni.He hunah tho hian Dr.L.Ringluaia'n Declaration of medical ethics chhamrualna kaihruaiin IMA, Mizoram state branch buatsaih lehkhabu,"medical terminology in mizo", mizo tawnga damdawi lam kaihhnawih tawngkam hrang hrang lehlin a dah te chu Chief Minister in a tlangzarh nghal a ni. Conference hma ni khan IMA hian pre-conference workshop and CME buatsaihin "change your lifestyle, prevent heart attack and stroke" tih thupui hmangin zirhona an nei a ni. An conference ah hian hruaitu thar thlanna buatsaih a ni a, inthlanna hi MJA ten an kaihruai ani.