Independence Day Football Tournament khelh mek chu vawiin khan Rajiv Gandhi Stadium, Mualpuiah final khelh a ni a, Chief Minister Pu Lal Thanhawla chuan khuallian niin a hmanpui.

Chief Minister chuan independence day hi ni pawimawh tak a ni a, keini Mizote pawh India khua leh tui dik tak kan nih angin a lawmna pawh urhsun taka hmang tur kan ni a ti a. He ni lawmawm denchhena Mizoram Football Association (MFA) in football tournament a buatsaih chu a lawmawm tak meuh a ni a ti.  Pu Lal Thanhawla chuan ram a thang zel a, infiamna lam atang leh thil dang dang atangte in khawvelin Mizote min rawn hmelhriat ta deuh deuh a, hnam changkang leh zahawma kan insiam hi kan duh ber a ni a ti. Thalaite tan sortkar chuan a theihna apiangah an hmasawnna turin hma kan la chho ve reng a, kum 2016 a Olympic lo awm turah te kan thalaite an tel ve ngei theihna turin tunah hian Olympic Vision 2016 kan kalpui chho mek a ni a ti. 

Chief Minister hian MFA pualin Sairang Dinthar vengah sorkarin ram a pek thu a puang a, he ram a pekah hian MFA chuan thalaite tana tul an tih angte an kalpui dawn a ni.

Football final hi Chanmari FC leh Dinthar FC ten an khel a, Chanmari FC hian 2 -1 a Dinthar FC hi hnehin an champion a ni. Champion Trophy leh certificate bakah pawisa fai Rs.1 lakh an dawng a, Dinthar FC hian trophy leh certificate bawk bakah pawisa fai Rs.50,000/- an dawng bawk a ni. Top scorer leh best player te hnenah samsung smart phone hlan a ni bawk a ni.

Independence Day Football Tournamentah hian 1st Division team 8 leh Mizoram Premier League (MPL) team 8, an vaiin team 16 an chhuak a ni.