Chief Minister Pu Lal Thanhawla chuan nimin tlai dar 7:30 khan Aijal Club-ah Southern Asia Division of Seventh Day Adventists Presidents’ Council hawnna a hmanpui.

Chief Minister chuan Mizote hi hnam mawl, thingbul, lungbul be thin nimahila Pathianin a Chanchintha hrilturinkhawvela sakhaw lian ber ber pathumin min karcheh chungin min zawng chhuak a ni, a ti a. Kristian-na hian Mizote hi kan nunphung a rawn thlak danglam nasa hle a ni tiin,. rambuaia kum sawmhnih chhung kan awm lai chuan A chanchintha hril a harsa hle a, tunah chuan remna leh muanna hnuaiah hmalam panin chanchintha hrilin ram hrang hrangah missionary kan intir chhuak theih tawh a ni a ti a. Seventh Day Adventists kohhran-te hi an thurin leh inzirtirna piah lamah, mihringte hrisel zawk nana zuk leh hmuama an hmalaknaah leh nunphung tha kan neih theihna tura kan ei leh inah te an hmalakna te hi an entawn tlaka, hetiang inkaihhruaina hi zawm thei vek ni ila hnam hrisel leh changkang kan nih ngei ka ring a ni a ti.

Presidents’ Council hiIndiaram hmun hrang hrangah kumtin neih thin a ni a, tun tum hi Mizoramin a thlen vawikhatna a ni. Southern Asia Division of Seventh Day Adventists huam chhung India, Nepal leh Bhutan atanga bial hrang hrang hruaitute rorel intawhkhawm Presidents’ Council hi naktuk atang chuan Tourists Lodge, Chaltlangah August ni 18 thleng neih chhunzawm a ni dawn a. Seventh Day Adventists hi khawvelah Division 13 a awm a. Division hnuaiah hian Union, Conference leh Section ang tein an awm ve leh a ni. Mizoram hi Section atanga hlangkai chho tawhin tunah hian Mizo Conference of Seventh Day Adventists dinhmunah an awm mek a ni. Tuna Council hi Section, Conference leh Union theuha an Presidentte intawhkhawmna a ni. Division bial chhung hmun hrang hrang atangin palai 62 an kal a, Presidentte bakah college principal te an tel bawk a ni.

Inkhawm hi Southern Asia Seventh Day Adventists Vice President Dr.Lalchansanga Colney in a kaihhruai a, Chief Minister te nupa hi duhsakna thilpek an hlan bawk a ni. 

Hetiang Presidents’ Council-ah hian Chief Minister Pu Lal Thanhawla hiBangalorean neih tumin  leh Mizoram chu Mizo Conference a hlankai anih tumin khuallian alo nih tawh bawk thu sawilan a ni.

He Division hnuaiah hian hospital 15, college 8 leh school 108 an enkawl mek thu tarlan a ni bawk.