Pu K.Lianzuala MLA, Chairman Mizoram KVI Board chuan India Independence Day champha vawi 66 na, Vairengte a lawmna ah Khuallian ni in a hmanpui a, India hnam puanzar a pawt pharh.

Vairengte a India Independence Day lawmna inkhawm hi Zing Dar 7:00ah Sub-Divisional Officer (C) Complex ah neih a ni a, Khuallian Pu K.Lianzuala MLA, Chairman Mizoram KVI Board chuan Hnam Puanzar pawt pharh a thu sawiin “India Independence day Vawi 66na a lo thlen hian, tharum tel hauh lova India zalenna sualchhuaktu India Hnam Pa Mahatma Gandhi leh a thuihhruaite bakah India tan a Martar mi huaisente kan hrereng a, zahna Chibai kan buk a ni. India ram, khawvel a mipuite rorelna (Democracy) ram lian ber ah hian India Hnam Pa Mahatma Gandhi lo mitthla angin, hnam hrang hrang leh sakhaw hrang hrang te inngeih tlang takin kan cheng za a, hei hian India ram ropui zia a tarlang a ni a ti.

Khuallian chuan “Mizoram chu India rama State ralmuang ber a nih avangin hmasawnna pawh chak takin a kal thei a, Remna leh Muanna hlut zia hria in kan ralmuanna tichhe thei tharum thawhnate, chi bing inlak hran tumnate hi dovin, State ralmuang ber kan nihna hi I vawng him zel ang u” a ti.

Pu K.Lianzuala chuan “ Mizoram in rualkhai tak a hma a sawn theih nan Pu Lalthanhawla kaihhruai sorkar chuan, chhungkaw harsa zawkte chawikan nan NLUP a kalpui zel a, kum 3 chhung in chhungkaw 1,20,000 tanpuina pek hma a ni a, chhungkaw 15,000 ten NLUP tanpuina an dawn theih nan chak tak a hma lak mek a ni. Sorkar laipui in NLUP hi min phurpui  em avangin Planning commission pawh in cheng Vbc 1208.82 min pechhuak tawh a, NLUP avang hian Tlangram lo neih a tlem tial tial a, ramngaw kan humhalh tha hret hret thung. Kan sum leh pai lakluh pawh a thang nasa a, ei leh bar ah pawh kan intodelh chho tial tial dawn a ni” a ti bawk.

Khuallian chuan “Development hrang hrang, Inkalpawhna, Kawlphetha, infiamna, Zirna lam leh Hriselna lamah te Pu Lalthanhawla kaihhruai sawrkar hian chak takin hma a la chho mup mup a, PMGSY hnuai atangin thingtlang khaw 164 kawng laih zawh a ni tawh a, Tuivai Hydro electric Project MW 210 pechhuak tur pawh thawh tan tur a phalna lak a ni tawh” a ti bawk.

Independence Day Football leh Volleyball final ropui tak khelh a ni a, Tv. Zoengmawia Hlondo 28^th National Boxing Gold Medalist chu chawimawina hlan a ni bawk.

Khuallian Pu K.Lianzuala MLA hi a nupui Pi Zothankimi Pachuau leh Pu Tinkhandala Chief Executive Officer bakah official dang ten an tawiawm a ni.