Vawiin khan Kolasib-ah India Independence Day vawi 67-na ropui taka lawm a ni a, Tumpui field-ah Pu PC Zoram Sangliana, Transport Minister in hnam puanzar pawtpharhin March Past chibai a chhanglet a. Mipuite hnenah thuchah a sawi.

Pu Ramsanga chuan, Mipui rorelna, Mirethei chawikanna leh remna leh muanna te ti hlawhtling tura inhlan thar tura sawmin sawrkar hmalakna hrang hrangte a sawi a. Tuna Pu Lal Thanhawla kaihhruai sawrkar hian mipuite hnena vote a zawn lai atanga a au hla Miretheite chhanchhuahna leh thalaite khawvel thar chu mipuite leh Pathian hnena a intiamna a ni a, vote zawn nan chauh a ni tiin sawichhe mahse mi retheite chhanchhuahna kalpui theia kana wm hi Pathian malsawmna kan dawn a ni, a ti a. Mizote hi pi leh pu atanga khawtlang ram, mahni mamawh ang zela lo leh ram nei thin ten harsatna kan tawk ta a. NLUP hmanga ram neilo ten an neih leh a ram vawn dan thar siam chhuah hi a thiltum a ni, a ti.

Power lamah sawrkar hian hmasawnna tamtak a nei a. Tute chhungkua-in emaw sum duhluat vanga an tih chingpen vek tawh 60 MW pe chhuak thei tur Tuirial Hydel Project, Kolasib Dist. Chhung ami chu Pu Hawla sawrkar alo din veleh khan chak taka bawhzui a ni a, 75 % vel zawh tawh a niin kum 2014 tawpah chuan Commission theih beisei a ni ti a ni. Bairabi Thermal Plant, Kolasib Dist. Ami pawh 11 MW englai pawha tlan thei reng tura buatsaih a niin Serlui B Mini Hydel Project atang pawhin 8 MW tlan tir reng a nita bawk a ni, a ti.

Printing & Stationary pawh thuam chakin tunah hian lehkhabu chhu tur, Calendar leh Diairy etc chhu tur tan phai pan buai ngai lovin Aizawl-a tih theihin a awm ta a ni, a ti bawk a. Bairabi thleng chauha rel kawng lo lut chu Sairang thlenga lut tura chak taka hma lak a ni a, ram leh hmun neitua inchhal uchuak taka compensation beiseitu te leh latute avanga duh anga thil a kal chak theilo erawh chu a pawi hle a ni, a ti a ni.

Kolasib-a I-day lawmnaah hian Contingent 15 awmin Uniformed contingent zinga lawmman latute chu 1-na 1st IR Bn, 2-na Govt, Diakkawn HS NCC leh 3-na Excise & Narcotic an ni a. School contingent atangin 1-na JNV Thingdawl, 2na Govt. Kolasib HS leh 3-na Hmar veng HS te an ni. I day lawmnaah hian Khuallian chuan March past-a tel zawng zawngte hnenah nihliap a pe a, Kolasiba thuthar thehdarhtute hnenah leh Office leh NGO, Institution hrang hrangte hnenah thilpek Wall clock a pe bawk.

Khuallian hi a nupui Pi Lalthlamuani’n a tawiawm a ni.