Ram pum leh Mizoram hmun hnrang hrang rualin, vawiin khan Kawrthah-ah pawh Independence Day vawi 67-na chu lawm a ni a, Independence Day Parade-a contingent te chibai changletin Pu Lal Thanzara, Parliamentary Secretary to Chief Minister chuan Independence Day lawmna hi Kawrthah-a a hmanpui a ni.

Pu Lal Thanzara chuan he hunah mipui kalkhawmte chu duhsakna chibai bukin India ramin Zalenna a sual chhuah hi tharum tel lova, zahawm taka sual chhuah hmasakna ber a ni a, hemi avang hian a ropui leh zual a ni, a ti. Zalenna kan hmuh hi British awp behna atanga zalenna ni mai lovin, dikna leh tharum tel lohna hmanga hnehna a ni zawk a ni, a ti bawk.

Pu Lal Thanzara chuan ramin zalenna a neih atangin hmasawnna namen lo a thlen thusawiin chung te chu sum leh pai ruangam kan thannate, ram dangte nena kan sum veivir a than chho danah te hian a ni a, Science, IT leh Civil Nuclear Energy lama phei chuan kan hmasawnna te hi khawvel hriat tham a ni tawh a ni, a ti bawk. India ram, khawvela Democracy ram lianber a keini Zofate, Pathianin min lo dah hi a lawmzawmzia ngaituah thar leh ang u tiin Parliamentary Secretary chuan Sakhaw zalenna kan neih te hi Kristiante tan phei chuan Chanchin Tha puan darhna kawngah kan zalen phah a, a vanneihthlak takzet a ni a ti.

A sawizel naah Pu Lal Thanzara chuan Mizoram Sawrkarin hmasawnna a thawh mek leh a hmachhawpte tlangpui a tarlang a, Kawrthah Sub-Division hnuaia hmasawnna te pawh a sawi tel bawk. Chung zingah pawimawh thenkhatte chu – Bairabi-Zamuang Road-a, Tlawng lui kanna tur PSC lei dawh hna March 2014 a zawh fel a nih tur thu te; MSDP Mamit hnuaia Girl’s Hostel pakhat Kawrthah-ah sak mek a nih thu te; SDEO Pisa sakna tur Administrative approval pek tawh a nih thu te; Lungkulh Reserve Forest chei tum a nih thu leh a project thehluh ani tawh thu te; Mizoram hmundang ang lovin Kawrthah Forest Division hnuaia private teak te hralh theih an thu te; PHE Sub Division Kawrthah tun thla tawpa hawn a ni tur thu te leh 4th IR Battalion Headquarter tur lungphum fel tawh thu te a ni.

State hmasawnna turah hmachhawp lian pui pui te a hlawhtlin nan mipui, sawrkar hnathawk leh kohhran hruaitute, tlawmngai pawlte tanpuina leh thawhhona mamawh a nih thusawiin, an thawhpuina chu Pu Lal Thanzara’n a ngen a ni.