Independence Day Invitation Footbal Tounament vawiina Assam Rifles Lammuala Mizoram Police (MRP) leh Aizawl Football Club (AFC) te Final khelhah Chief Minister Pu Lal Thanhawla chuan a hmanpui.

Chief Minister chuan Independence Day hi National Day anih angin ni pawimawh tak, mi zawng zawng tena kan hlutsak tur a ni a ti a. He ni pawimawh tak denchhena Mizoram Football Association (MFA) in football tournament a buatsaih hi a lawmawm tak zet a ni a ti a, team tel zawng zawngte chungah lawmthu a sawi a ni.

Chief Minister chuan kan ramah thalaite tan kawl a eng chho zel a, sorkar pawhin an mamawhte phuhruk chhoh zel a tum a ni a ti a. Mahni inthunun nan sports hi a pawimawh a ni tih kan hriat a tha a ni a ti. Olympic zawh fel taka India medal lak zat khan tan kan lak ala ngaihzia a ti chiang a. Chuvangin theihtawp chhuah chho zel turin thalaite ka sawm nawn leh a ni a ti.

Mizoram Football Association President Pu Lalthanzara, Parliamentary Secretary chuan team tel zawng zawngte chungah te leh official leh Umpire chungah te, tournament hlutsaktu mipui chungah te lawmthu a sawi a ni.

Independence Day football tournament hi July ni 30 atanga khelh tan kha a ni a. Team lut zawng zawng hi 10 an ni a, an zinga team 2, ONGC, Mumbai leh Oil India te chu sawmbik (invitees) an ni.

Vawiina Final khelhah hian MRP chu Championin, AFC hi 3-2 in an hneh a ni.

Champion team hian Trophy leh certificate bakah pawisa fai Rs.1 lakh an dawng a. Runner - up in Rs.50,000/- leh certificate an dawng bawk a, semi finalists ten Rs. 12,000/- ve ve an dawng bawk a ni.

Independence Day Football final khelh hma hian MFA buatsaihna hnuaiah vek 4th Mizoram Women Football Championship final khelh a ni a. Team 12 luhna ah hian Finalah College Veng Sporting Club in Tanhril Football Club tiebreakah 4-3 in an chak bawk a. Champion team hian trophy leh certificate bakah Rs.20,000/- an dawng a, runner up hian trophy, certificate leh Rs.10,000/- an dawng bawk a ni.

Independence Day Football final khelh hi Assembly Speaker Pu R. Romawia leh K. Liantlinga ten an en ve a ni.