765/2024-2025

Dated Aizawl, the 12th June, 2024: Nizan khan Vanapa Hall ah India Missions Association Global Mission Summit, 2024 hawnna inkhawm buatsaih a ni a. He inkhawm hi Upa Lalduhoma, Chief Minister chuan a telpui.

Thusawiin Chief Minister chuan, he Missions Association member, rawngbawltu tam tak te hian hun harsa leh khirh tak tak in tawk tawh thinin ka ring a. In rawngbawlna ten ngaihhlut leh ngaihthlak an hlawh lo fova, a chang chuan nangmahni ngei pawh dinhmun hlauhawma in din chang pawh a awm thin ang. Tunah erawh chuan Mizoram, Kristian ram, state ralmuang, in rawngbawlna te, kristian nun dan tha tinreng te ngaihhlutna hmun, Kristian tihdanin hmun pawimawh a channa ramah in rawn inkhawmpui a. Thlamuang takin, hahdam takin awm ang che u. Hun dangah pawh chawlhhahdam in duh chang te, boruak ralmuang tak hnuaia thawk han lak in chak chang pawhin rawn zin thin ula, Mizoram hian chanchintha hriltute hi kan zahin kan ngaisang a, in tana unau rinawm leh in tana tawngtaifo thin te kan ni tih in hrereng dawn nia, tiin a chah. Chief Minister hian, Kristian ten kan ramah zirna lamah te, fahrah chawmna lamah te, hriselna leh vantlang siam thatna lamah kan thawhhlawk hle a. He rawngbawlna hi i uar deuh deuh ang u; ndia Missions Association hmalakna hi a ropui hle a, in kal zelna turah duhsakna ka hlan che u a ni, tiin palaite a chah a ni.

Summit hawnna inkhawmah hian Rev. R. Vanlalnghaka, Moderator, Mizoram Synod chuan hunserh a hmang a, Rev. Dr. K. Lallawmzuala chuan palaite inhmelhriattirna neiin, Rev. Andrew Semp, Chairman, IMA chuan chibai bukna thu a sawi a. Rev. Dr. Isaac Soundaraja, General Secretary, IMA pawhin thusawina hun a hmang a ni.

Tun tum Summit thupui atan hian Missions Beyond Regions tih chu thlan a ni.