766/2024-2025

Dated Aizawl, the 12th June, 2024: Chief Minister Pu Lalduhoma chuan vawiin khan Aizawl Civil Hospital-a nau neihna hmunhma (Labour Room leh Maternity Ward) Rogi Kalyan Samiti (RKS) sum Rs. 95.40 lakh hmanga thuam thar chu a hawng.

Chief Minister chuan, Infant Mortality Rate hi ram hmasawnna thlen chin min hrilhtu pawimawh a ni a. UN pawhin Millenium Development Goals ah khan IMR hi tehna pawimawh zingah a telh a ni. IMR hniam ram chu ram him, chenna atana ram ralmuanga ngaih a ni. IMR tha kan neih theih nan hian sawrkar laipui chuan nu nau hring tur zawng zawng te chu damdawiin emaw sub centre ah ngei nau nei thin turin a duh a, hmalakna pawh a kalpui nasaa, chutianga ti te chu nau neih lawmman te a pe hial thin. Naupiang hlim thihna te, nu nau chunga boral an tlem deuh deuh theih nana damdawiinah ngei nau hring tura kan inzirtir rual hian kan damdawiin leh kan nau neihna hmunhma te kan lo thuam that ve zel a ngai bawk a. Aizawl mipui tana pan awlsam leh lun, Civil Hospitala kan nau neihna hmunhma te tihchangtlun a ni hi a lawmawm hle, a ti a. Health Minister leh a thawhpuite, RKS Governing Body chungah te lawmthu a sawi a ni.

Doctor leh medical lama thawktute chu rawngbawlna pawimawh tak chelh tute in nih avangin in thiamna bakah in tawngkam leh chetzia thlenga damlote tana thlamuanpui tham a tling thin. A pantu apiangten lawm taka an chhuahsan zel theih nana theihtawp lo chhuah thin ang che u, tiin a ngen a ni.

RKS Governing Body Chairman Pi Nazuk Kumar, IAS pawhin thusawiin, Maternity Ward leh Labour Room kan thuam thar hi kan lawm hle a, he hmuna hnathawktute thawmrimzia leh taihmakzia hi ka mit ngeiin a hmuhpui a. Hmunhma tha zawk leh hmanraw changtlung zawk an mamawh hle tih te ka hriatpui a ni. Chuvang chuan RKS Governing Body chuan nau neihna lam te hi a theih chen chena thuam that kan titlu ta a. Vawiinah a lo puitling ta a ni. Chief Minister ngeiin min hawnsak thei hi kan lawm hle, a ti.

An thawm thatte chu:

• High Dependency Unit tihlen leh tihchangtlun
• State of the art labour and delivery room
• Infection control tha zawk siam
• Patient privacy and comfort tihchangtlun
• Toilet block unit 7 siam belh
• Post natal and ante natal wards thar leh zau zawk
• Doctors and staff te hmanrua tihchangtlun te a ni.

Dr. Catherine Ngurbiakveli, Head of Department, Obs & Gynea chuan an hmalak dan tlangpui a sawifiah a, thlatin an nau neihna hmunah hian nau 320 an chhar ziah anga chhut a ni a. Anmahni pantu tumah damdawiin danga kal turin an tir ngai lo. Tuna an nau neihna hmunhma tihchangtlunna bultumtu Pi Nazuk Kumar, Aizawl DC leh RKS Governing Chairman ni bawk chungah an lawm hle.

A hawnna inkhawm hi Dr. ST Lalruatfela, Sr. Medical Superintendent chuan inkhawm hi a kaihruai a, Dr. Lalchhuankimi, Medical Superintendent in lawmthu sawiin inkhawm a khar a ni.