767/2024-2025

Dated: Aizawl the 12th of June: Nimin chawhnu khan Mizoram Government School Teachers' Union (MIGOSTU) chuan Chanmari YMA Hall, Aizawlah Special Conference an nei a, School Education Minister Dr. Vanlalthlana chu Khuallian niin hun a hmanpui.

MIGOSTU Special Conference-ah hian Khuallian Dr. Vanlalthlana, Education Minister chuan sawrkarin zirna a ngaih pawimawhzia leh ṭan lak nasat a tumzia a sawi langin,school Education Department-a la thleng ngai lo thil thar pawh kan hmuh chhoh zel a beisei thu a sawi bawk. Sawrkar chuan an puala sum hman tur pawh budget-ah dah a nih thu a sawi a, chak taka hmalak zel a tum thu a sawi bawk. Tun hnaia school provincialised thara zirtirtu lo kal khawm MIGOSTU member-te mamawh chu tihlawhtling turin sawrkarin theihtawp a chhuah thu a sawi.

Minister chuan zirtirtute chuan an zirlaite taima tak leh puitling ngei tura zirtir turin a chah a. Mi dangte tana thil ṭha titu nih chuan nakinah mahni vek chungah thil ṭha a rawn let ṭhin a, zirlaite hmangaih leh duhsak taka zirtir ṭhin turin zirtirtu kal khawmte chu a fuih bawk a ni. Minister chuan zirtirtu kal khawmte chu hnenah fuihna thuchah print zirlai naupangte chu syllabus an zirtir piah lamah zirlai laktlak, mi puitling, mahni kea ding theia chherchhuak tur leh nunphung ṭha leh system dik, life skills hrang hrang leh environment humhalh pawimawhzia te zirtir uar thin turin a chah  bawk a ni. Chumi tihhlawhtlinna  kawng khat atan 'Intodelh zirtirna' pawh High school-ah kalpui a nih thuai a beisei thu a tarlang a. Ram leh sawrkar ṭha siam tur zirtirtute hi an pawimawh em em a, an kutah Mizoram hma lam a awm a ni tih hriaa theih tawp chhuaha ṭan la zel turin MIGOSTU member kal khawmte chu a sawm a ni.

He Special Conference hi a pawl Vice Chairman Pu David LC Chhakchhuak chuan a kaihruai a. He hunah hian an member chatuan ram pan tate sunna hun an hman bakah an pawl General Secretary Dr. K. New Israela'n an pawl dinhmun report tlangpui a pe bawk a ni. He hunah hian Khual Lian Education Minister Dr. Vanlalthlana bakah Khual Zahawm Pu Lalsangliana, Director, School Education leh an pawl President Pu Lalzirliana ten thu an sawi bawk a ni.

He Teacher Union, MIGOSTU hnuaiah hian Middle School, High School leh Higher Secondary School ṭhahnem takte an inzawm khawm a ni.