College of Teachers Education (B.Ed zirna) tia hriat thin, kumin 2012 March thla a Institute of Advanced Study in Education (IASE) a hlankai chu vawiin khan Chief Minister Pu Lal Thanhawla chuan an Campus, Republic Vengah a hawng.

Chief Minister chuan tunlai khawvelah thiamna tak tak zir chhuah angaih avangin zirtirtu thiamna tha nei an awm angai a, chutiang thiamna sang, M.Ed zir theihna IASE kan nei ta hi a lawmawm tak meuh a, rahbi tharah kan chuangkai a ni a ti a. Tunlai hi thalaite hun a ni tiin, India phei chu khawvelah thalai ngah ber a ni a ti a. Chuvangin thalaite tan khawvel thar siam sak hi hna pawimawhah neiin, sports lamah leh zirna sang zawk an neihna turin nasa takin hma kan la a ni a ti a. Sports lamah hmunhma tha zawkte siam sakin, zirna sang NIT, IIMC, leh Management te kan nei sak tawh a, tul dang tam takah hma lak mek zel a ni a ti. Zirna tha leh belhchiandawl thalai ten an zir chhuah theih nan Education Reforms Commission pawh din a ni tiin, Chief Minister chuan chumia rawtna te tipuitling tur chuan sum tam tak angai a, tunah rih chuan kan dinhmunin ala tlin lo a ni a ti. Chief Minister chuan sorkarin quality education kalpui a, chhawr tlak thiamna (employability) thalai ten an neih hi kan duh ber a ni a ti a. Hemi lamah hian skill development chu tul hmasa a ni a, amaherawhchu sum harsatna avangin duh angin a kalpui theih loh a ni a ti.

Education Minister Pu Lalsawta chuan Mizoramah chauh qualified nih hi a tawklo, khawvela qualified nih hi tum zawk tur a ti a. Kan thiamna hian khawvel tiamna a umphak angai a, chuvangin hetiang M.Ed zir theihna kan nei thei ta te hi a lawmawm tak zet a ni a ti a. Lehkha kan zirte hi chhawr tlak leh hna hmu tlak ni tura kalpui sorkar chuan a tum mek a ni a ti a. Hmalakna kan ngah a, sawiselna pawh a tam, hna kan thawk a ni tih a lantir a ni a ti. Hnungtawlh zawngin ngaihtuahna kan hmang ngailo a ni a ti a. Pu Lalsawta chuan hetiang trainingna tha hian zirna tha a siam ngei ang a ti.

Mizoram University Vice Chancellor Pu R.Lalthantluanga pawhin thusawina neiin University-ah chuan M.Ed zirna a awm lova, MA Education erawh a zir theih a ti a. IASE in M.Ed Course a pe thei hi a vanneih thlak a ni a ti a. 12th Plan chhung hian Mizoram Universityah rualbanlo te tan B.Ed special course neih tum a ni a ti.

IASE hi tun hma chuan school zirtirtu ten B.Ed an zirna in, Mizoram Institute of Education tih leh College of Teachers Education tia hriat thin a ni a. Kum 2005 September thla khan Teachers’ Education Approval Board tia thlak a ni a.Kum 2011 khan Mizoram University Academic Councilin M.Ed Syllabus pawm sakin, kumin 2012 March ni 12 khan National Council for Teachers Education (NCTE) in recognition a rawn pe a ni. Kumin 2012 August ni 1 atang khan M.Ed Programme hi kalpui tan a ni ta a, enrolment 24 an awm a ni. B.Ed zirlai pawh 100 an awm mek bawk.

Hawnna inkhawm kaihruaitu Pu K.Lalnghinglova, Commissioner & Secretary, Education chuan central sorkarin kum 2015 ah chuan zirtirtute chu trained vek an ni tur tih thuchhuah a siam chu a sawi a. Tunah hian Mizoramah training neilo (untrained teacher) 4228 an awm mek a ni a ti.