299/2022-2023
26.4.2022: Chief Minister Pu Zoramthanga chuan vawiin khan INTACH Mizoram Chapter lehkhabu siam "Built Heritage of Mizoram 2021", Mizorama building hlui ding lai chanchin ziahna chu CM Conference Hall-ah a tlangzarh. Art & Culture Minister Pu R. Lalzirliana pawh he hunah hian a tel a ni.
Chief Minister chuan vawiina lehkhabu release chu hlu a tih thu sawiin, buatsaihtute fakawm a ti a. Thangtharte tan pawh tangkai tak tur nia a hriat thu a sawi. Chief Minister chuan kan heritage neih ang angte hi tha taka vawn zel chu mipuite a neither kan nih anga kan tih ngei tur nia a hriat thu sawiin, sawrkar pawhin a tlin chin ang zelin theihtawp a chhuah zel tur thu a sawi a. Pipute sulhnu vawn him lamah pawh rilru a harh tharin, humhalh nachang te hma kan sawn zel niin a lang a, nungchan, thing leh mau humhalh nachang te pawh kan hre zel a. Hei hian a tha lama hnam hma kan sawnna a tilang a ni, a ti a. Harsa tak chunga INTACH member te thahnemngaihna avanga an hmalakna leh sawrkara an thawhpui Art & Culture te hmalakna zel turah duhsakna a hlan a ni.
Art & Culture Minister Pu R. Lalzirliana pawhin thu sawiin, mi tam tak tana tangkai tur lehkhabu siama INTACH hmalakna chu fakawm a ti a. Mizo culture humhalh lama Art & Culture Department chuan mawhphurhna lian tak a neih thu a sawi a. Pipute sulhnu humhalh te, nun ziarang leh a kaihhnawih hrang hrang humhalh danah fimkhur tla erawh a ngaih thu a sawi a. Minister chuan 'a hun mil zelin' tia mi mit lak tum lutuk avanga hnam lam emaw, zo thuam leh puan te hi kan tih changkan tum naah a nihna dik tak hmuh tur awmlo khawp a kan siam danglam palh a hlauhawm theih thu a sawi a. Kan mi hmasa te hla phuah te pawh chawisan thiam zel pawimawh a tih thu a sawi.
Hun kaihruaitu INTACH (MC) Convener Pu P. Rohmingthanga chuan Mizoram ah khawvela lar tham In ropui leh lian awm lovin, tuna la ding chhun te hi chu Sap ho lo luh hnu ami, (Assam type) te an nih ber thu leh, hengte hi Mizote tan chuan hlu tak a nih thu a sawi a. Heng In hlui neihchhun tlemte te hi ti chhe lova kan humhalh a tul a, chumi atan chuan an chanchin ziahna, saptawnga 'listing' an tih hi siam tak a nih thu a sawi a. Mizorama kan hman lai In la awm chhunte pawh hi kan history ah hmun pawimawh tak an lo luah ta der a ni tiin, heng In te hi INTACH Mizoram Chapter chuan thiah phal lovin, 'reconstruct' tih te 'repair' tih te ai chuan 'restore' ni zawk se tih hi a duh dan a nih thu a sawi.
INTACH (MC) Member Secretary Pu Lalram Thanga chuan lehkhabu tlangzarh tak tlangpui report a pe a. Mizoram hmun hrang hranga a sorkar pisa te, kohhran biak in leh private In hlui, kan rochunte chu Archaeological Survey of India in kum 2010 a kaihhruaina a duan, 'National Mission on Monuments and Antiquities' a siam zulzuia building hluite chu kum 1950 hma lam a mi chauh telh a nih thu a sawi a. Kum 2014 khan a vawi khat na he 'listing' bu hi a vawi khat nan siam a lo ni tawh a. Tun lehkhabu tharah hian building hlui 71 tarlan a ni a (a hluiah 88); chung zinga 17 te chu Assam Rifles enkawl lai mek an ni, an awmna chhunga mi an ni. 14 hi kohhran hrang hrang PCI, BCM, ECM leh SA te hnuaia enkawi niin 27 hi sorkar building an ni a, a bak 13 te hi mimal ta anni. Heng building hlui 71 te hi district paruk (Aizawl, Lunglei, Khawzawl, Kolasib, Serchhip leh Siaha) ami te a ni.
Prof. JV Hluna, member chuan lawmthu sawiin hun a khar a ni.
INTACH pawl chuan hmanlai thil hluite, pi leh pu rohlute, hmanlai atanga hnam nunphung dante, thu leh hla, history leh culture, tlang leh lui, thing leh mau, ramsate, a dang tamtak mai, khawih theih (tangible) leh khawihtheihloh (intangible) te humhalh hi a dinchhan ber a ni a, chung zingah chuan hmanlai In te pawh a tel a ni.
Attachment
- Loading attachment...
