298/2022-2023

Champhai, the 26th April, 2022: India ram zalenna kum 75 na tlin hriatrengna leh lawmna pual Azadi Ka Amrit Mahotsav (AKAM) lawmna denchhenin vawiin khan Khawzawl RD Block huamchhunga Kawlkulh PHC ah  Kawlkulh leh a chhehvel khuate tan National Health Mission (NHM) bultumin 'Hriselna Kutpui' Block Level Health Mela buatsaih a ni.

Khuallian Khawzawl District Bawrhsap Pu C.C. Lalchhuangkima chuan sawkarin mipuite harsatna hriatthiampuia an hriselna ngaipawimawha Champhai lam atanga doctor thiam tak takte a chhawp hnaihsak leh, a thlawn veka damdawite a sem chhuak chu lawmawm a tih thu a sawi a. Mipuiten Health Mela an hlut chu lawmawm a tih thu pawh sawiin, health mela kaltlanga hlawkna an hmuh theih nan duhsakna sang ber a hlan  a ni.

Health Mela hawnna inkhawm tawi buatsaih hi Dr. R. Lianmawia, Chief Medical Officer, Champhai chuan  a kaihruai a. Dr. Hillary Remsangpuii, Medical Officer, Kawlkulh PHC chuan lawmthu sawiin hun a khar a ni.

Vawiin Health Mela ah hian doctor 10 rual leh thawktute, NHM leh Health department hnuaia programme hrang hrangin clinic leh stall hrang hrang 19 an hawng a, mipui tana a thlawna inentirna leh service dang chi hrang hrang buatsaih a ni. Health Mela hi mipuiin an hlut hle a, chhinchhiah danin vawiina Block Level Health Mela buatsaihah hian damlo mai bakah mahni hriselna thlithlaia inentir mi 1,300 chuang an awm tling a, remchanna leia Doctor hrang hrangte rawn khawp nghal an awm nual bawk a ni.

Azadi Ka Amrit Mahotsav Block Level Health Mela, Kawlkulh PHC a neih kaltlang hian a thlawna inentir leh damdawi semchhuahna hun buatsaih a ni a. Clinic hrang hrang hawn niin, natna hrang hrang neite leh taksa hriselna inthlithlai duhte tan remchanna siam a ni a. Inkaichhawn theih loh natna lam te, zuk leh hmuam kaihhnawih lam te, rilru hriselna lam te, HIV/AIDS kaihhnawih lam te, ECG, Ultrasound, Family Planning & Councelling bakah Mobile Medical Unit thlenga buatsaih a ni a, khawl changkang zawk hmanga sample endik tulte pawh lak a ni a. He hunah hian Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihnate pawh kalpui niin, Specialist leh Doctor thiam tak takte chu mipui rawn theih turin clinic hawngin nilengin an ṭhu a ni.

Hriselna Kutpui hi April ni 18 atanga 29, 2022 chhung hian India ram puma District hrang hranga Block Level tinahte neih tura ruahman a ni a. Undivided Champhai District bikah a hmasa ber ni turin April ni 18, 2022 khan Hnahlan PHC ah Champhai RD Block tan neih a ni a, April ni 21, 2022 khan Khawbung RD Block tana Khawbung PHC a neih a ni a, vawiin April ni 26 hian Khawzawl RD Block tan Kawlkulh PHC ah neih ni ve lehin, ruahman dan chuan Undivided Champhai District-a a hnunhnung ber ni turin April ni 29 hian Ngopa RD Block tan Ngopa PHC ah buatsaih tum a ni bawk.