297/2022-2023

Ṭau thla ni 26, 2022: Ministry of Health and Family Welfare, Govt of India-in India Independence kum 75-na lawmna, "Azadi ka Amrit Mahotsav" puala April ni 18 - 29, 2022 inkar chhunga India ram chhung block tina health mela (hriselna kutpui) buatsaih tura a ruahman angin, vawiin khan National Health Mission (NHM), Health & Family Welfare Department huaihawtin Lawngtlai District-a block pali zinga a hnuhnung ber atan Sangau Block tan Blue Mountain High School, Sangauah block level health mela buatsaih a ni.

He hun hi Lawngtlaia Senior Medical Officer Dr S. Thaizi chuan hmanpuiin, health mela chungchanga thil pawimawh hrang hrang a sawi fiah a. Sawrkar hma lakna chu a lawmawmzia hria a, hlut nachang hre turin kal khawmte chu a chah a ni.

Sangau Block tana health mela buatsaihah hian Primary Health Centre (PHC), Sangau leh District Hospital Lawngtlai aṭangin doctor-te leh thawktute, NHM leh Health Department hnuaia programme hrang hrang te'n clinic leh stall hrang hrang an hawng a. He'ngah hian mipui tana a thlawna inentirna leh counselling hrang hrang buatsaih niin, hri danna te pek a ni a, a theih chin chinah a thlawnin damdawi sem a ni bawk. Stall hrang hrang zingah hian inkai chhawn theih loh natna (non-communicable disease), zuk leh hmuam kaihhnawih (tobacco), rilru hriselna (mental health), HIV/AIDS kaihhnawih (MSACS), mit entirna, ha entirna leh NHM hnuaia programme hrang hrang inphona hmun te buatsaih niin, Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihna te, AB-PMJAY Golden Card siamna hmun te buatsaih a ni bawk.

Heti hian Lawngtlai District chhunga block 4-ah block level health mela hi buatsaih kim a ni ta a. April ni 18 khan Lawngtlai Block tan Govt Region Higher Secondary School, Lawngtlaiah, April 21 khan Chawngte Block tan Kamalanagar Public School, Chawngte-ah leh April 22 khan Bungtlang 'S' Block tan Synod Home Mission School, Bungtlang 'S'-ah te buatsaih a lo ni tawh a. Vawiin khan Sangau Block tan Blue Mountain High School, Sangauah buatsaih a ni ve leh ta a ni.

Lawngtlai District chhunga block hrang hranga health mela buatsaih hi mipuiin an hlut hle a. A huaihawttute pawhin manhla an tiin, an lawm thu an sawi.

Attachment

  • Loading attachment...