No.4426/2021-2022
Aizawl 28.3 2022: Department of Information & Public Relations chuan an department din kum 50-na vawiin khan I&PR Auditorium ah ah lawm a. He hunah hian Chief Minister Pu Zoramthanga chu khuallian niin, I&PR Minister Pu Lalruatkima chu khualzahawm a ni.

Chief Minister chuan Golden Jubilee plague hawngin, Souvenir a tlangzarh bawk a. Kum 50 tlin chu thil ropui tak a nih thu sawiin, I&PR Department a thawk mek leh a hma zawnga lo thawk tawh thinte chungah lawmthu a sawi a ni. I&PR department chuan hmanlai atang tawhin sawrkar leh mipui rawngbawl hna pawimawh tak a thawh thin dan leh, a hunlai mil zela information pekchhuah nan media technology hman tangkai a nih dan te a sawi a. Tunlai hunah information a chak tawhin, thu pawimawh puanchhuah dan kawng chi hrang hrang a tam leh awlsam tawh dante a sawi a. Chief Minister chuan a tha zawnga mitinin kan hman thiam theih nan I&PR chuan mawhphurhna a neih dan a sawi a. Mipuite hriattur a news puanchhuah hi chiang tak leh ngil tak ni thin se tiin, I&PR department chu chanchinbu mite nen innghenghnai taka thawkho an nih angin hetiang zawngah pawh hian mawhphurhna an neih thu a sawi. Chief Minister chuan I&PR Department thawktu indaihlohna te chu a hriatpui thu sawiin, sawrkar sum dinhmun a ziaawm hunah heng harsatna te hi sutkian a nih tur thu a sawi.

I&PR Minister Pu Lalruatkima chuan I&PR Department chu sawrkar policy hlawhtling taka a kal theih nana mipui hrialhhriat kawngah te, thuthar pawimawh tak tak puanzar te mai bakah, mipui leh sawrkar kara palai hna thawk, mipui mar dektu, hmasawnna hna tluan g taka a kal theih nan a mawhphurhna lian tak nei a nih thu a sawi a. I&PR Department a chakloh chuan sawrkar pawh a chaklo a ni, a ti. Minister chuan khawvel pumpui hrilengin a tihbuai avanga thu leng vak belhchian dawllo a tam laia mioui hnena thu rintlak puanchhuah kawnga a thawh thatzia te a sawi bawk a. He deoartment in golden jubilee a thlen hian tuna thawkute leh a hmaa bul lo tantut hnenah lawmthu a sawi bawk a ni.

Vawiin I&PR Department Golden Jubilee lawmna inkhawn hi Director Pi Lallianpuii chuan a kaihruai a. Department tobul te sawiin, rambuai lai atanga vawiin thlenga hna a thawh dan te a sawi a ni. He programme ah hian department a lo thawk tawh, pension a chhuak ta te hnenah Memento pek a ni a. Joint Director Pu C. Lalnunkima chuan lawmthu sawiin hun a khar a ni.

District Council hunlai atang khan Information Officer ruat niin bul tan a ni a. Union Territory a nih hnu ah office building neiin, kum 1972 khan Information, Public Relations & Tourism (IPR&T) tiin department puitlingah hlankai a ni. Khatih hunlai khan Protocol leh Art & Culture department hi a la pianloh avangin tuna an hnathawh te hi a lo thawk thin a ni. Kum 1980 khan Printing & Stationery Department chu indangin, kum 1987 khan Tourism Department chu he department atang hian a indang leh a ni.

Tun dinhmunah Ministerial post 52 awmah post 30 luah a ni a, AVPA (Cameramen/ Protographer, etc.) post 63 ah 38 a ruak a, Group ‘A’ (Officer) post 48 ah 19 luah a ni.