No.4427/2021-2022
Aizawl the 28th March, 2022: Vawiin khan Social Welfare Minister Dr K. Beichhua chuan Pukpui, Lungleiah Lunglei Observation Home & Lunglei Special Home leh Serkawn, Lungleiah One Stop Centre a hawng. Heng ruhrel te hi sawrkar laipui Ministry of Women and Child Development kaltlanga ruahman an ni.

Hawnna inkhawm ah hian Lunglei HPC Vice Chairman Pu Lawmawma Tochhawng, MYC Chairman Dr Vanlaltanpuia, Lunglei DC Pu Kulothungan A leh official dangte, Lunglei MJA-te, khawtlang hruaitute leh tlawmngai pawl hrang hrang aiawhte an tel.

Hawnna inkhawm Pi Zoramthangi Chhangte, Jt Director, WCD kaihhruaiah Social Welfare Minister Dr K. Beichhua chuan ram leh hnam hmasawnna kawngah naupang leh thalaite zirtirna tha pek a pawimawh takzet thu sawiin hmasawnna daih rei leh tlo nei turin zirna lama hmasawn chu thil pawimawh hmasa berte zing ami a ni, a ti a. Kan naupangte leh thalaite zirtirna tha leh dik kan pe em tih kan in ennawn fo thin a tul a ni tiin naupang zirtir, venhim leh enkawl ngaite hamthatna ngaihtuah kawngah thar thawh a, theihtawpa hma la tlang turin Mizoram mipuite a sawm a. Ruhrel ruahman thar te chu neitu rilru pu a, tha taka lo enkawl pui turin a khawtlang mipuite a sawm bawk.

Social Welfare & Tribal Affairs leh Women & Child Development te chuan nausen, nu leh naupangte, thalaite, pianphunga rualbanlote, kum upa zawkte leh tribal-te hamthatna leh hmasawnna turin theihtawp an chhuah mek zela, thawktute an hna a an inpekna leh an thawrimna a chhuanawm takzet a ni, a ti a. Mizoram chuan program hrang hrangah ram pum huap lawmman te dawngin Poshan Abhiyaan hnuaiah India ram puma ti tha ber Overall Excellence in Implementation leh 1st Prize in Implementation of ICDS-CAS te bakah Champhai District chu ram pumah District ti tha ber niin Thingdawl Block chu ram puma Block ti tha ber lawmman an dawng hiala; Nu naupai leh naupawm te tana sawrkar laipui program Pradhan Mantri Matri Vandana Yojana (PMMVY) hnuaiah Serchhip District chu 2018-19 leh 2019-20 khan India ram pumah Best Performing District lawmman an dawng hial a ni, a ti a. Heng hmalakna hrang hrangah hian Department-te chuan theihtawp an chhuah chhunzawm zel dawn a ni tiin hun reilote ah tar pension-te pawh an account a thun sak Direct Benefit Transfer (DBT) a kalpui tum a nih thu a sawi.

Lunglei Observation Home & Lunglei Special Home te hi Pukpui, Lungleiah awmin a project cost hi cheng nuai 422.72 lakhs niin a contractor-te chu Lushai Engineers, Ramhlun, Aizawl te an ni. A sak hna hi July 2018 ah khan bultan niin 2nd December 2020 ah zawh fel a ni a; Covid-19 hrileng avangin zawhfel veleh hawn a ni thei ta lo a ni. He Complex chhungah hian Boys Observation Home; Boys Special Home; Classroom, Library, IT Room etc awmna School; thawktute chenna tur Quarter pali; Administrative Building, Common toilet & Duty Post te a awm bakah a hmun hi uluk takin fencing chhuah vek a ni.

Lunglei Observation Home leh Lunglei Special Home te hi Section 41 of the Juvenile Justice (Care and Protection of Children) Act, 2015 hnuaia registered niin Government certified Child Care Institutions (CCIs) an ni. Women and Child Development, Social Welfare Department, Govt. of Mizoram te enkawl niin heng Home ah te hian naupang 50 (mipa 40 leh hmeichhia 10) lenna tura ruahman a ni.

Observation Home-ah hian naupang dan nena inrem lo (juvenile in conflict with law) te dah lailawk thin niin thla ruk chhung ngeiin an chung thu hi rel fel tur a ni a. Observation Home a an awm chhung hian JJB chuan naupang awmzel dan tur chu a rel fel hman tur a ni. Observation Home atanga mahni in emaw chenna a la let remlo te (dan kalha chetna lian tham deuh emaw nungchang siamthat nana hun duh rei deuh chi) chu Special Home-ah hian an awm chhunzawm thin a. Naupangte hian school leh skill development zirna an neih thin bakah mithiamten uluk takin counseling leh therapy ten an neih pui thin a ni. Special Home-ah hian a rei ber kum thum aia rei an awm tur a ni lo. Tun dinhmunah Lunglei Observation Home ah mi pahnih leh Lunglei Special Home ah mi pathum an awm mek a ni.

Vawiin veka hawn One Stop Centre, Serkawn hi Baptist Church of Mizoram (BCM) leh Social Welfare Department te tangkawp hmalakna niin a sakna hmun hi BCM-in ram a hman hawh tir a ni.