Vawiin chawhnu khan Chief Minister Pu Lal Thanhawla chuan New Secretariat Complex-ah Irrigation & Water Resources Department(I&WRD) Office Building thar a hawng.

Mizoramin hmathlir thui tak neiin hma alak chhoh mek zelah Irrigation tenau ringawta innghah a theih reng dawn lo tih a hriat vang te, buh leh bal, ei leh in kawnga intodelh nan irrigation a pawimawh avang a hna lian zawk thawk thei turin Minor Irrigation Department tih thin chu Irrigation & Water Resources Department ah thlak a nih thu Chief Minister chuan a sawi a.

" Mizoram State hi kum 30 upa, mihring mihrinna atanga teh pawhin kum 30 chu puitlin hun tawh a ni a, heng hun chhunga kan Department tam tak te pawn  mahni puala Office building thar an neih tak zelah chuan puitlin zia an chhuah a,  an hmunhma thar te chuan an efficiency pawh a tihsan chhoh zel,  Zoram mipui ten kan beisei a ni", a ti a. Chief Minister chuan, " Department hrang hrang hnathawk tu kan officer te zingah , a beneficiary, a mipui te aia changtlung zawk, engkim  nei an awm te hi a mawi em aw? Beneficiary te aia, huan nei tha zawk, thlai tiak nursery nei tha zawk, sangha chi nursery nei tha zawk,  sangha dil nei tha zawk, buh hmun leh thlai hmun nei tha zawk te hian an hmalaknaah  hlawhtling an inti em? An chawikan tur kuthnathawktute an la berh em em laia  anmahni lo inhmakhua hi thil tihchi a ni em tih hi an inbihchianna turah ngai se kan duh", a ti a. Mirethei chanai laksaktu chungah sawrkar chu a thik tu a chhe hle a ni a ti.

Nakum emaw chhunga puitling mai tura beisei, Act East policy hmanga hmalakna chuan Mizoram chu "Gateway for Trade and Commerce" atan a hmang dawn tih a sawi a. Chu hmalakna lian tak chu Mizoram in a tangkai thei ang bera hman a tum a ngai a. Mizoram mipui tam berin eizawnna atana an hman mek,  Agriculture & Allied Sector huang chhunga theihtawp chhuah chu mithiam ten a hlawk ber tura an ngaih thu sawiin chumi hawi zawng chuan sawrkar ang leh sawrkar hnathawktu leh  kuthnathawktu te pawn thahnem an ngaih a tul dawn a ti a. Agriculture & Allied Sector nawrkal turin Irrigation a pawimawh takzet thu a sawi a. Chief Minister chuan  tuikawng tha zawk siam a, tui harsatna hmun tam tak te thlai hmun atana chantir a, hralh tham leh company te pawn 'tam' an tih zah tharchhuah  a nih theih nan I&WRD, Horticulture, Agriculture leh Agriculture & Allied Sector huang chhunga hmalakna zawng zawngah te tanlak a ni dawn a ti a. Irrigation a huang zauh turin power mamawhna a nasat tel avangin kawlphetha siam tura theihtawp chhuah tel mek a nih thu pawh a tarlang a ni.

PWD SE Pu Lalruatkima (Project Circle) in technical report a pek dan chuan I&WRD Office building hi kum 2010 December ni 10 khan,  LIC(P) sum  hmanga sak tan niin a sak zawkna atana senso zawng zawng chu Rs 754.22 lakh a ni a. I&WRD Office Building hi chhawng 7 asang niin a chhawng zawng zawng te belhkhawm in he building len zawng chu Square Metre 3490/- a ni a; He building-ah hian Lirthei 14 hun theihna hmun siam tel a ni.

I&WRD Office building hawnna inkhawm hi I&WRD Secretary Pu H.Lalengmawia'n a kaihruai a; Mizoram State Planning Board Vice Chairman Pu H.Liansailova bakah I&WRD lo kaihruai thin tawh tute - Parliamentary Secretary hlui  Pu K.S. Thanga, MLA  leh Mizoram State Election Commissioner Pi L.Tochhawng, Chief Secretary hlui te leh I&WRD Chief Engineer  ni mek, Pu Lalrotluanga ten thusawina hun an hmang a ni.