Mizoram chhung Khawpui fai inelna atan Kawnpui Town huam chhungah Faina lama hmasawnna kawng hrang hrangin neih chhoh mek a ni a, Village Council hrang hrang te chuan nimin khan Kawtlai hnatlang neiin; Office leh Zirna In te pawhin an theih ang angin hnatlang an nei ve nghal bawk.

Cleanliness Competition Committee, Kawnpui Town-in alo rel angin, nimin khan Kawnpui Town chhunga VC hrang hrang te chuan Kawtlai hnatlang kovin, YMA nena tangkawpin khaw chhung thenfai a ni a; vawiinah pawh veng thenkhat chuan kawtlai thenfai hna hi an thawk chhunzawm a ni.

Nimin vek khan Kawnpui Town chhunga Sawrkar Pisa leh Zirna In te chuan an mahni rem chan angin Fai hnatlang hi an nei ve nghal a, kar kalta Inrinni khan mahni In leh a vel tifaiin Chhungkaw hnatlang neih a ni tawh bawk.

Khawpui Fai inelna atan hian Kawnpui Town chhunga mipuite hnenah Faina leh thianghlimna lam inzirtirna FLS leh Chanchinbu kaltlanga neih a ni a; VC tina Sanitation Committee ten vantlang hmun leh kawng kam a tam thei ang berah Bawlhhlawh bawm dah belhin, Faina lam hawi inzirtirna Hoarding te tar a ni bawk.