Vawiin hian Serchhip Bawrhsap pisaah, Bawrhsap Pi Sangchhin Chinzah hovin Health Department leh Department pawimawh sawm bik ten UNICEF hmalakna hnuaia naupang awmna (Pneumonia) leh kawthalo (Diarrhoea) tam lutuk pumpelhna tur ruahmanna Action Plan siam dan tur an rel.

Chairman Pi Sangchhin Chinzah chuan, mihringin natna kan tawrh tam tak hi hriatna kan tlakchham avanga kan tawh te, thianghlimna lam kan hlamchhiah lutuk vanga kan tawh te a ni thei a. Chuvang chuan hrisel tura kan tih tur thil tam tak te ngaihven nasat deuh deuh leh, thianghlimna lama nasa taka hma kan sawn zel a pawimawh tak zet zet a ni, a ti.  UNICEF leh WHO mithiamte hmuh danin khawvela naupang kum 5 hnuailam te thihna thlentu langsar Awmna leh Kawthalote pawh, invenna hmanga pumpelh theih, kan faten an lo tawh palh pawha a nih dan tur ang thlapa enkawl chuan dam leh mai thei, a ni a. Chuvang chuan a invenna kan ngaihven te, a enkawl dank an hriatchian te a tul hle  ani a ti.

Dr. Laldawngliana Sailo, Chief Medical Officer pawhin thusawiin, heng natna chi hnihte hi miin a kai hnuah chuah Medical lam chuan a lo buaipuiin a lo enkawl thin a. Amaherawh chu kai lo tura inven theih, hriatna leh thuawihna hmang tangkaia pumpelh theih natna a nih avangin Health Department chuah nilo, Department dangte nena thawh ho ngai a, Action Plan ah pawh Department dangte nena thawk hova ruahmanna siam a tul a ni. Theihtawp chhuaha kan thawh ho phawt chuan nasa takin heng natna pahnihte lakah hian kan fate an him ngeiin a rinawm a ni, a ti a. Department hrang hrang te chu thawhho puiah a sawm a ni.

He hunah hian Dr. Lalrinzama (Padiatrician), Serchhip Hospital chuan Awmna leh Kawthalo naupangten an kai thin chhan te, natna thlentu langsar zualpui te leh a enkawl dan tlangpui sawifiahna a nei a. UNICEF hi he Global Action Plan a ruahman dan te pawh sawifiahna hmang nghal in; heng naupang thihna thlentu langsar tak natna pahnihte hi awlsam tea inven theih a nih dan leh a kaite tan pawha sum tlem te seng a tihdam mai theih a nih zia sawifiahna a nei a ni.

Vawiina meeting hian Chief Medical Office lamin District Action Plan chu kimchang deuh takin lo duang se, a hnuah a tul anga en ho leh nise tiin an rel a ni

United Nations (UN) hnuaia Agency pawimawh pahnih, The United Nations Children's Fund (UNICEF) leh The World Health Organization (WHO) ten khawvel puma naupang kum nga hnuai lam te thihna, 29% zet thlen thintu natna, ven theih reng nisi Pneumonia leh Diarrhoea natna kum 2025 hmaa a mi tam zawkten kan pumnpelh ngeina tur ruahmanna a siam (Integrated Global Action Plan for Pneumonia and Diarrhoea / GAPPD)  kal zel ah; UNICEF chuan Assam State a inbun in India ram State hrang hrangah Workshop a kalpui mek a. Mizoramah pawh Workshop hi buatsaih tawh a ni. He hmalakna kal zelah hian District tinte chu District Action Plan siam tura tih an nih angin Serchhip District pawhin vawiin hian heng natna pahnihte nihphung leh a lo awm chhan te zirchiang chungin Action Plan siam dan tur a rel ta a ni. GAPPD in a tum ber chu heng natna pahnihte kum 2025 a hmun thuma thena hmun hnih (2/3) tala tih nep a ni.