September ni 3-9, 2017 chhunga Gold Coast, Australia-a Commonwealth Weightlifting Championship neiha India aiawha a tel Jeremy Lalrinnunga leh Zakhuma ten Youth 56Kg category-a Gold Medal leh Silver Medal an dawn lawmpuina leh anmahni chawimawina hun vawiin khan Sports & Youth Services Minister Pu Zodintluanga hovin SYS Department thawktute, Mizoram State Sports Council member-te leh Weightlifting Association te nen Minister pisa ah neih a ni a. He hun hi Pu Hmingdailova Khiangte MLA in a hmanpui bawk a ni.

Sports Minister chuan international level-a Mizo thalai ten gold leh silver medal an dawng thei chu Mizoram tan hmingthatna an ni tiin medalist-te a lawmpui thu a sawi a. Jeremy phei chuan a telna category-ah record a siam avangin Mizo thalaite hian infiamna khawvelah an tum phawt chuan a ber nihna kan chang thei reng tih a tihchian thu a sawi. Vawiina medalist chawimawite hlawhtlinna hi a bulpui ber chu an insumtheihna, tumruhna leh chak ngei tumna avang a tih loh theih loh thu sawiin Sports Minister chuan thalai dangte infiamna khawvel a hlawhtling duhte tan anni chu entawntlak a tih thu a sawi a. Sorkarin infiamna discipline hrang hrang tihmasawn tura hma la a infiamna hmunhma tha a siam te hi hman tangkai chhunzawm zel piah lama thalai ten mahni nun an uluk a an vawn that theuh a duh thu a sawi bawk.

Commonwealth Youth, Junior & Senior Weightlifting Championship 2017-ah hian Jeremy Lalrinnunga hian 56kg Men-ah 109kg (Snatch) leh 131kg (Clean & Jerk) a rit chawiin Gold Medal a la a, Snatch bik ah hian Commonwealth Youth category atan record a siam nghe nghe a ni. Zakhuma hian 56 kg Youth-ah bawk Snatch 95 kg (Snatch) leh 120 kg (Clean & Jerk) a rit chawiin Silver Medal a dawng a ni.

Jeremy Lalrinnunga hi Olympic Games 2020, Commonwealth Games 2018 leh Asian Games 2018 atana medal beiseiawm India ram pum atanga mi 152 Olympic Task Force ten an thlanchhuah zingah a tel a. Heng mi 152 thlanchhuah te hian September ni 1, 2017 atangin thlatin Pocket Allowance cheng singnga Ministry of Youth Affairs and Sports atangin an dawng dawn a ni. Hetianga mi beiseiawm bik thlanchhuahna Target Olympic Podium Scheme-ah hian Mizo an tel vawikhatna a ni. He hmalakna hian infiamna discipline 14 a huam a, heng infiammi 152 thlanchhuahte hi sorkar laipuia Ministry of Youth Affairs and Sports leh Sports Federation ten an chhawpchhuah Olympic Task Force in a lo thlitfim leh an ni.

Vawiin programme hi Pu H.L. Rochungnunga, Secretarty, SYS Department chuan kaihruaiin, Jeremy Lalrinnunga, Gold Medalist Lifter hnen atangin competition a hmachhawn dan ngaihthlak a ni a. Weightlifting Association aiawh atangin leh Pu C. Laltlanthanga, MSSC Secretary hnen atangin thusawi ngaihthlak a ni bawk. Vawiin programme-ah hian Silver Medalist Zakhuma chu state pawn programme dang avangin a tel ve theilo a ni.