Vawiin khan AH&Vety Conference Hall, Farm Veng, Lunglei ah PRRS hri avanga Lunglei District a vawk thi ralna hun hman a ni a, Pu C. Lalzuiliana, SDC in a hmanpui.

He hun Dr.Vanlalbuanga, DAH&VO, Lunglei District kaihruaiah hian khuallian Pu C.Lalzuiliana chuan thu sawiin vawk vulh tute hmakhua ngaia Mizoram sawrkar leh AH& Vety Department-in hetiang a vawk chante a ngaihsak chu lawmawm a tih thu a sawi. Ran vulh hi mihringte eizawnna hmasa te zing ami a ni a, a bik in vawk vulh hi Mizo hnam nun nen a inzawm tlat a, Mizote hi vawksa duh em em kan ni a, chumi avang chuan mitin ten sa thianghlim  kan ei theih nan a vulhtu te pawh in uluk tak leh thianghlim takin an vulh a tul a ni tiin, AH&Vety Department-in a hri danna pek tur an tih ang taka la turin a chah a. Vawk sa hi a hralh na lam ah harsatna a awm lova, chuvangin eizawnna tlak a ni a, District dang leh State pawn atanga vawk lak luh ngai lo tur leh District leh State pawn thleng a thawn chhuak thei tur khawpa tan la thar turin kalkhawmte a fuih a.

Dr.Vanlalbuanga pawhin thu sawiin vawk natna laka invenna kawngah AH&Vety Department leh vawk vulhtute’n thawhho na tha tak an neih a tul a ni tiin vaccine pek ngai pawimawh reng turin kalkhawmte a chah a. Vawiin vawk thi ralna programme-ah hian vawk puitling tawh thi chu Rs 1000/- a ral niin vawk note thi Rs 500/- a ral a ni. Mizoram pumah PRRS vang a vawk thi 5812 an awm a, hemi ralna atan hian cheng nuai 30 dah a ni a, Lunglei District ah vawk thi 572  an awm a, heng vawk thi te ralna atan hian Rs 3,96,000/- sem a ni.