Chief Minister Pu Lal Thanhawla chuan tukin khan Lengpui Airport-ah 1 Mizo Air Squadron NCC & First Flying Training Sortie a hawng.

Chief Minister chuan NCC Air Wing in Microlight thlawhtheihna (aircraft) a nei ta chu Mizoram NCC tan ni chhinchhiahtlak a ni, a ti a. He Microlight NCC thlawhtheihna hmanga Mizo thalai NCC Air Wing ten thlawhtheihna khalh an zir thei dawn ta hi, inthlan dawna kan manifesto a kan tarlan tipuitlingtu a ni, a ti. Hun rei vak lovah Mizo thalai te Indian Air Force-ah kan hmuh theih kan beisei a ni tiin, Mizote hi khawl hmang thiam tak kan nihna ah beiseina kan nei sang hle a ni, a ti.

Sport Minister Pu Zodintluanga chuan 1 Mizo Air Squadron NCC hawn alo ni ta chu thalai te tan hma thar a ni a, hmasawnna rahbi pawimawh tak a ni, a ti a. Thlawhtheihna khalh zirna kan kawtkai ngei ah kan nei thei dawn ta hi a lawmawm tak meuh a, Chief Minister hmalakna rah ropui tak a ni, a ti. Microlight Aircraft dahna hangar chu Rs. 9.43 lakhs senga sak anih thu a sawi bawk.

Major General R.K. Sharma, ADG, NCC Directorate, NER Shillong pawhin thusawiin 1 Mizo Air Squadron Ncc in Microlight Aircraft an nei ta hi Chief Minister Pu Lal Thanhawla hmalakna a ni, a ti a. NCC Air Wing din atanga kum1 leh a chanve chhung leka hetiang ti puitling thei a ni hi a chhuanawmin a fakawm hle a ni tiin, hmundangah chuan kum 3 aia tam te an duh thin a ni, a ti.

Mizoram NCC Air Wing hi nikum 2011, May 23rd a din a ni a. Ataka kalpui tur hian thlawhtheihna te chi Microlight aircraft hi neih tel a tul a. Tunah hian India rama Air Squadron NCC 50 awmah, Microlight aircraft hi 45 dah a ni a, chumi zingah chuan Ist Mizo Air Squdron NCC hi an tel ve a ni.

1 Mizo Air Squadron NCC ah hian Officer 1, Airmen 17 leh Civil staff 7 awm in , Directorate of Sports & Youth Services hnuaiah Head of Office (Schedule-III) dinhmun a luah ve a. School 26 atangin Air Cadet 1800 an awm mek a ni. Kumin 2012 November ni 15th-24th chhung khan STC Tanhril-ah Annual Training Camp hlawhtling tak an lo nei tawh bawk a ni.

1 Mizo Air Squadron NCC Microlight Aircraft hi ZEN AIR CH 701 STOL Model a ni a, Pilot leh Cadet pakhat (Two-seater) chuan theihna a ni a. Air Cadet te hian Silai kah, lam (drill) leh khawl siam te zirin, Aero Modelling, thlawhna lem siam leh thlawhtir te an zir bawk dawn a. Indian Air Force a luh theihna kawng a awlsam phah dawn bawk ang. An training zawh ah kumtin exam neiin, 60% mark hmu pha te chuan written exam tih ngai tawh lovin, IAF a pilot ni turin direct in interview a hmachhawn nghal thei dawn a ni.

Vawiin a hawnna a First Training Flight (Sortie) ah Pilot, Wing Commander R.K. Punia leh Joseph Lalhruaitluanga, Synod HSS Air Cadet te an thlawkchhuak a ni.

Hawnna inkhawm ah hian Chief Minister hi a nupui Pi Lal Riliani bakah Ministers; Dy. Speaker; Parliamentary Secretaries; MLA; Principal Consultant, Civil Aviation; Brig.S.P. Rawat leh mipawimawh thahnem tak an tel a ni.