Chief Minister Pu Zoramthanga chuan vawiin khan Junior Engineer Service Association of Mizoram (JESAM) General Conference vawi 4-na chu Chanmari YMA Hall-ah khuallian niin a hmanpui.

Chief Minister chuan Junior Engineer kalkhawmte chu works department a thawk vek an nih avangin sawrkarin hmasawnna hna a thawh naah hma latu pawimawh an nih thu a sawi a. Mahni hna pawimawhna hria a mipui rawngbawlna kawnga thahnemngaihna avangin association pawh din an nih ngei a rin thu leh, thahnemngai taka thawk zui zel turin a fuih. Chief Minister chuan sawrkar department hrang hrang chak zawka thuam a tul thu a sawi a. Mizoram tihhmasawn tura hmabak ramin a neih zingah ngaihtuahna, rilru puthmang tihdanglam a pawimawh zia a tarlang. Mizoram chu ram tha leh zau, sik leh sa ruahtui duhthusam, society zirtir leh kaihhruai nuam tak, lehkhathiam tamna, ram muanawm si a nih thu sawiin hengte hi hmasawnna tiawlsamtu leh ram tam takin an neih ve loh a nih thu te, keini Zoram mipuite chuan ngaihtuahna thar pu a, taima taka thawhho chuan hmasawnna hi awlsam taka hmuh theih a nih tur thu a sawi a. Hmasawnna ah hian Mizo hnam hi hmahruaitu kan nih a ngai a ni, Chief Minister chuan a ti.

Vawiin JESAM General Conference hi thawh khatna chu an Chairman Pu PLC Lallawmkima, President chuan kaihruaiin, Pu PC Lalthanliana, General Secretary hnen atangin report ngaihthlak a ni a. An member mi 12 lo boral tawhte sunna hun hman a ni bawk. Chawhnu lamah member promotion hmu lawmpuina leh pension thlahna neih ni bawkin rorel in chhunzawm a ni.

Junior Engineer Service Association of Mizoram (JESAM) hi 1.10.2015 khan din a ni a. Mizoram sawrkar ah ni 7.12.2015 khan ziahluh (recognised) a ni. Mizoram Sorkar hnuaia Department hrang hrang - PWD, PHED, P&ED, Agriculture, LAD, AMC, UD&PA, Horticulture, RD, LADC, MADC etc. a Junior Engineer thawk mi zariat (800) chuang te chu JESAM ah hian an awm a.