Ramchhung hmundangte rualin vawiin khan Chhimveng YMA Hall, Mamit-ah World No Tobbacco Day, 2019 chu hman a ni a, Dr Lalrozama, District Bawrhsap chuan khuallian niin a hmanpui.

Dr Lalrozama chuan zuk leh hmuam chu a la ti ve lote tan chuan tih loh mai chu a pawimawh thu a sawi a, kan nu leh pa leh rual u zawkte'n an lo tih nasat tawh avangin bansan harsa ti takin an awm mek a, chuvang chuan zirlai naupang thangtharte chu a bawiha tang ve miah lo turin a chah a ni. Zuk leh hmuam chuan kan hriselna kawng hrang hrangin a tichhe nasa hle a, kan hmel thlengin a khawih chhe thei  a ni tiin taksa hrisel leh vun nalh tak nei tura pawimawh em em zuk leh hmuam laka fihlim turin zirlai naupangte a chah a ni.

Khuallian hian Tobacco Smoke Free School a thlan Govt Kawrtethawveng hnenah chawimawina thuziak a hlan bawk a ni.

He hunah hian K. Lalnunhlimi, Social Worker chuan a lem nen vaihlo leh a kaihnawihin kan taksa a khawih chhiat theih dan hrang hrang leh COTPA dan hnuaia vaihlo leh a kaihnawih humhalhna dan hrang hrang a lem nen a entir bawk.

World No Tobacco Day pual hun hman hi Dr Vanlalfela, CMO Mamit chuan kaihruaiin, Govt Higher Secondary School zirlaite, leh tlawmngai pawl aiawhte telin.Dr Lalmuanawma, Jongte SMO chuan lawmthu sawina a nei bawk.

World No Tobacco Day pual hian Govt Higher Secondary School Mamit zirlai naupangte tan Slogan Writing Competition buatsaih a ni a. Lawmman pakhatna dawngtu hi Lalruatfeli Cl - XII niin pahnihna hi Milonjoy, Cl-XII leh Pathumna hi Lalawmpuii Cl-XII zirlai chuan a dawng a ni.

National Tobacco Control Programme( NTCP) te hian Mamit District Hospital-ah Tobacco Cessation Clinic hawn niin Zuk leh hnuam ti mi 980 in pan tawhin mi 90 chuangte chuan zuk leh hmuam an nghei tawh a ni.