Chief Minister Pu Lal Thanhawla chuan vawiin khan Helicopter-a lehlangin Chawngte a tlawh a, Chakma Autonomous District Council hmalakna a Cultural Hall cum Museum Kamalanagar a sak a hawng.

Cheng Vaibelchhe 6 senga sak, Kamalanagar Cultural Hall cum Museum hawnna inkhawmah Chief Minister chuan hetianga hall tha tak cheng vaibelchhe 6 man lai mai sak zawh a ni chu a lawmawm hle a. Sak theih anih theih nana Chakma MLA 2, Pu Nihar Kanti Chakma, Minister of State for AH & Vety leh Pu Nirupam Chakma te inpekna avang leh Chakma Autonomous District Council hruaitu Chief Executive Member Pu Kali Kumar Tongchangya leh a thawhpuite thahnemngaihna vang a ni a ti.

Chief Minister chuan District Council chhunga hmasawnna tluang taka a kal chhoh zel theih nan sorkar ngelnghet neih angai a ni tiin, an mahni hmangaiha, enkawl zui zel turin mipui ten hmangaihtu an hriat a pawimawh a ni a ti. Sorkar hmalakna hrang hrang tarlangin, RGGVY hnuaiah khaw tinin eng an nei thei dawn a, kawngpui tha leh inkalpawhna tha pawh a tul ang zelin siam belh zel a ni ang a ti.

Chief Minister chuan tuipui leh khawmualah insumdawn tawnna awm turin sorkarin chak taka hma a lak chhoh mek thu a sawi bawk a. Mirethei leh chanhai ten eizawnna ngelnghet an neihna tura sorkarin NLUP a kalpui mek chu a hlawhtlin ngei theihna turin mipui ten taimakna, rinawmna leh dikna an ngaih pawimawh a tul a ni a ti.

Chief Minister hi Aizawl atangin Pu Nihar Kanti Chakma, Minister of State in a tawiawm a. Chawngte ah hian Pu Nirupam Chakma, MLA, Lawngtlai DC Pu B.Lalhmingtanga leh CADC CEM Pu Kali Kumar Tongchangya leh thawhpui ten an tawiawm bawk a ni.

Chief Minister hi Helicopter vekin chawhnu khan Aizawlah an lokir leh a ni.