Chief Minister Pu Lal Thanhawla chuan vawiin khan Lal Thanhawla Auditorium ah February ni 6 atanga February ni 12 chhunga hman tur Kangmei Ven Hapta, ‘Fire Prevention Week 2017’ chu a hawng. Kumina Kangmei Ven Hapta thupui atan ‘Ram Tikangtu - Ram Hmelma’ tih chu thlan a ni a, Kangmei ven hapta hriatrengna ‘Mascot’, kangmei chhuak lai leh sakhi tih chuanna ‘Khite-a’ tih chu hman ni bawkin, Mizoram chu India rama kangmei venna lama ‘mascot’ nei hmasa ber state a ni.

Chief Minister chuan kangmei ven hapta hman la ngai ta reng chu a tlawmngaihthlak zawk maha a hriat thu sawiin Ringtu za a za inti si, a ber kan nihna te hi a lawmawm loh a. Kangmei ven kawnga nasa taka theihtawp chhuah anih laiin ram tikang nasa ber kan la ni te hi a chhuanawm lova, hei hian tan lakna tur kan la nei tam zia a ti lang a ni, a ti a. Ramngaw leh nungchate hi Pathianin mihringte nena inmamawh tawn tura min pek a ni a. A thil siam zawng zawng nungcha, thing leh mau te tiamin chanchintha hril tur kan ni tih hi kan hriat a pawimawh a. Pulpit atangin nungcha leh thing leh mau te hnenah Chanchin Tha hril pawimawh zia hriain lo ti hma ila, kan ram hi nungcha leh thing leh mau kan hausa zawk a ngem aw tiin ngaituahna a lang a ni, a ti a. Kangmei ven hapta kan hmanna, a chhan leh vang te hriain entin nge ram kang hi kan tih tlem theih ang tia ngaihtuahna hmangin mitin kan fimkhur leh zual theihna turin theihthawp chhuah turin ka sawm che u a tiin he thil hi sawrkar, YMA leh tlawmngai pawlte kutah leh an mawhphurnaah chauh dah lova mitin hei hi kan mimal mawhphurhna a ni tih hi kan hriat a pawimawh ani, a ti bawk. Kohhran, tlawmngai pawl leh sorkar thawhhona tha tak a awm reng laia ram kan tikang nasa lutuk thin hi sim tur leh tan lakna tur kan la ngah hle a ni a ti.

Chief Minister chuan lo hal vanga ram kan tihkan mai piahlamah inthlahdah avang leh suahsual vang hrim hrima ram kang a awm thin a, ram kang chhan tam ber hi lo hal fimkhur tawk loh vang niin a lang a, khualzin te pawhin meizial bung ti hlum lova motor atanga an paih mai mai thin hian ram a tikang ve fo a. Zau khata lo kan neih ho loh vangte leh sawrkar thupek ngaihpawimawh loh vangin ram kang hi a thleng thin a ni, a ti bawk. Ram kang in mihring nun a nghawng dante sawiin tui a ti kang a, kan hnam rohlu thin leh mau tul lovah a riral a, khua a ti lum a, leitha a ti boin buhbal kan thar hlawk lo a heng bakah sum tam tak kan hloh a ni, a ti a. Ram hmelma kan nih lohna turin kangmei chhuak thei veng a, a tikangtu tur awm te pawh vengtu nih tum turin mitin a chah a. Kangmei ven hna kan thawhna a thlawna a awm loh nan theihtawp i chhuah zel ang u tiin mipuite a sawm bawk a ni.

Thusawitu dang Enviroment, Forests & Climate Change Minister Pu Lalrinmawia Ralte chuan India ramah ram tikang nasa ber state dinhmun ah Mizoram a din thu sawiin nikum chhunga ram kang dinhmun te a tarlang a. Kangmei ven hi mitin tihmakmawh a ni a tiin a thelh lam nilovin a ven kawnga entawntlak nih a tul thu a sawi bawk a ni. Hapta hawnna Chairman Chief Secretary Pu Lalmalsawma chuan nungcha thing leh mau humhalh leh kangmei ven hi thil kalkawp a nih thu a sawi.

Pu Lalram Thanga, PCCF & Principal Secretary in report pein, India rama ram tikang nasa ber kan nih laiin, a venna lama hma la nasa ber kan nih thu a sawi a. Mei hi mihringten kan mamawh rualin chhiatna thlen thei a nih thu a sawi a. Chuvangin ram kang tur ven nan State Level Fire Prevention Committee din a ni a ti a. Kangmei ven tulzia hi nasa leh zuala inzirtirin leh a puanzar hna uar zawka kalpui tul a tih thu a sawi. Kangmei ven hna phur taka thawh a nih theihna turin sorkarin ‘incentive award’ district leh village levelah a ti tha pathumna thleng siam anih thu tarlangin kangmei venna turin Forest Fire Management Plan te siamfel anih thu a tarlang bawk.

Kum 2016 chhungin lo hal hun bituk zawmlo khua 98 an awm a, Lo/Huan hal hmun 1328 ah awm laiin ram kang hrim hrim hmun 298 lai a awm a. 2009 atanga nikum thleng khan lo hal leh kang vanga nunna chan mi 14 an awm tawh bawk a ni. 2016 a Forest Survey of India (satellite) report a a lan danin kan mei chhuahna zau zawng hi square kilometer 44.47 zau a ni a, heng zinga 4 square kilometer zau hi ramkang niin a dang zawng hi lohal a ni.