Vawiin chawhma khan Convention Centre Lunglei ah Fire Prevention Week 2017 hawnna neih a ni. Pu K.Lalrohlua DC Lunglei in inkhawm kaihruai in Pu S.Laldingliana, Vice Chairman HPC Lunglei chu khuallian a ni.

Khuallian chuan thu sawi in Mizoram hmun hrang hrang ah lo hal leh kan fimkhur tawk loh thin avangin ram thalai tam tak a kang ral thin a, mihring nunna hial kan chan thin a ni. Ram kang leh tih chereu vang hian sik leh sa leh buruak a tichhia a, tuihna thlengin a tlem phah thin ani. NLUP hi ram kang venhimna pawimawh tak a ni a, lo nei mi tamtakin lo neih bansan in huan nghelnghet nei in enzawn nan an hmang tan a, tun atanga kum 10 hnu ah chuan ram kan tih chereu tawh te chu ramngaw tha tak ah kan siam thei dawn a ni a ti. Ramngaw, tui leh nungcha humhalh tur hian mitin in mawhphurhna kan nei theuh a ni. Kan thangthar te tan hmalak natur pawimawh tak a ni a ti. Kangmei venhimna kawng ah uar zawk in kan khawtlang ah tlangau pui in zirtirtu nih i tum ang u, hemi ti hlawhtling tur hian neitu rilru pu chung a tan la theuh turin kalkhawm te a sawm a ni. Fire Prevention Week chhung chauh ni lovin kum tluan a hmang turin a chah bawk.

Pu.H.Lianmawia, DFO leh Secretary Lunglei District Fire Prevention Committee chuan Sawrkar in lo hal hun a ruat March ni 15 hnu lam a lo hal te chu hmalak phal a ni dawn lo a ni a ti. Kum 2016 chhung a Fire Prevention Week hmalak dan te kangmei lak a kan inven dan leh kangmei in sik leh sa leh boruak a tihchhiat dan te powerpoint presentation hmangin a sawi. Kum 2016 chhung in lo hal hmun 194 ah a awm a ram kang zau zawng chu 807.58 Ha a ni. Forest fire vawi 10 a awm a 56.6 Ha vel a zau a kang a ni a ti.