No.3924/2021-2022
Aizawl the 7th February, 2022: Chief Minister Pu Zoramthanga chuan February ni 7 atanga ni 12 chhung Mizoram puma hman tur, Kangmei Ven Hapta (Fire Prevention Week), 2022 chu vawiin khan Synod Conference Centre-ah a hawng. Kumin thupui hi "Kangmei ven hi mi tin mawhphurhna a ni" tih a ni.

Chief Minister Pu Zoramthanga chuan kangmei chhuakin mi tam tak tan harsatna a thlen thin avanga mitin kan fimkhur a tul thu a sawi a. Nikuma Mizoram chhimlama nasa taka kawngmei chhuakin mi tam tak tan tawrhna a thlen thu sawiin, kangmei chhuak tam tak hi ven theih thil a nih avangin leh, kangmei laka invenhim hi kan ngaihpawimawh phawt chuan kan ram hi nasa takin hma kan sawn tur thu a sawi a. "A vannei ber tur chu keini kan ni dawn tih hria in kangmei laka kan inhumhim theih nan kangmei venna hapta kan hawn hian mitinah keima tan, kan chhungkaw tan, kan khawtlang tan a ni tih kan thinlungah kan dah theuh dawn nia" tiin Chief Minister chuan Zoram mipui a chah a ni.

Chief Minister Pu Zoramthanga chuan kum 2000 atanga kangmei laka fihlim theih nan a fire prevention commitee din a nih chhoh dan te a sawi a. Khawvel hmun hrang hrangah pawh kangmei nasa tak kum tin deuh thaw a chhuah thin dan te leh Mizorama kangmei chhuak tam tak hi chu ven theih thil a nih thu a sawi a. Kangmei chhuak tam tak chu lo halna atanga chhuak a nih avangin permanent land holding system - ram nghet neih a, agriculture lam a ni emaw, horticulture a ni emaw, forest plantation a ni emaw, chung chu eizawnna tha, economy chawisangtu a nih mai bakah ram kang laka invenna tha tak pakhat a nih tel tur thu a sawi a. Mei hi tangkai mahse thunun loh chuan chhiatna nasa tak thlentu a nih avangin mitin fimkhur a pawimawh thu a sawi.

Environment, Forest & Climate Change Minister Pu TJ Lalnuntluanga pawhin thu sawiin, Forest Survey of India report in Mizoram pum chhutin 28.28% chu kangmei chhuah hlauhawm berna hmunah puangin, 49.73% chu kangmei chhuah hlauhawmna leh, kangmei chhuah hlauhawm lohna chu 2.2% chauh a nih thu a sawi a. Heng a nih avang hian mzioram sawrkar chuan kangmei ven chu a ngaihpawimawh thu a sawi a. Dt. 31.1.2000 a State Level Committee on Fire Prevention din a nih atanga thahnem ngai taka hmalak a nih dan a sawi a. District leh khaw tina kangmei ven kawnga hmalakna hriatpui nan leh intihphur tawn nan a kumtin state level leh district level lawmman buatsaih a nih thu a sawi bawk. (Lawmman hi pakhatna cheng 50,000, pahnihna cheng 30,000 leh pathumna cheng 20,000 pek thin a ni). Kangmei venhim hna hi a taka hma la turin sawrkar chuan a mal beih theihloh thu leh, chumi atan chuan NGO hrang hrang, kohhran leh mipui thahnemngai tak takte nen tawhho a hma lak a nih dan a sawi a. Minister chuan kumin thupui chu mitinin pai a, mahni mawhphurhna te vawng tlat turin mipui a chah a ni.

Vawiin Fire Prevention Week hawnna inkhawm hi Pu Jitendra Kumar, Principal Secretary & PCCF, EF&CC Department chuan kaihruaiin, Pu Laltlanhlua Zathang, Member Secretary, State Level Sub Committee hnen atangin report ngaihthlak a ni a. Pu R.S. Sinha, Addl. PCCF chuan lawmthu sawiin hun a kar a ni.

Sorkar laipui in ramngaw kang ven nan CSS scheme - Forest Fire Prevention & Management Scheme a nei a. Kumtin Rs.100 lakh vel state a rawn pe thin a (2019-20: Rs. 108.12, 2020 to 21: Rs.114.28, 2021 to 22: Rs.87.19). Rampum leh district Level Committee ah he pawisa hi sorkar ramngaw chauh nilovin vantlang ram ven nan pawh hman tel a ni thin.
Kum 2021 khan District tin te chuan firelines siam leh firewatcher te ruaiin kangmei venna kawngah nasa takin tan an la a. Ruahtui tlak tlem avangin ramkang hi kum dang aiin a nasa a, chhim lamah phei chuan vanduaithlak takin an tuar nasa leh zual a ni.

Forest Survey of India chuan January 2021 atanga vawiin thleng hian ramkang hi hmun 12,726 ah a hmu a. Spot verification report angin November 2020-May 2021 chhunga hmuh chu hmun 4486 a ni, chu chu 14153.08 Ha. vel a ni. Hemi kang atang hian hmun 205 (2562.18 Ha.) chu sorkar ramngaw kang niin hmun 4281 (11590.9 Ha.) chu vantlang leh mimal ram kang, bawlhhlawh hal leh lo hal atangin a ni.

Attachment

  • Loading attachment...