No.3925/2021-2022
Aizawl the 7th February, 2022: ‘Kangmei ven hi mi tin mawhphurhna a ni’ tih thupui hmang a February ni 7 atanga ni 12 thleng awh tur, 'Fire Prevention Week 2022' hawnna hun chu Parish Hall, Venglai Kolasibah neih niin Dr. H. Lalthlangliana, Deputy Commissioner Kolasib chuan hun a kaihruai a. Pu K. Laldawngliana, MLA, 4-Tuirial (ST) Assembly Constituency bialtu chu khuallian niin kangmei laka fimkhur inzirtirna hapta, Fire Prevention Week hawnna hun a hmang a ni.

Khuallian Pu K. Laldawngliana chuan kangmei hi mihring fimkhur lohna avanga chhuak thei a nih thu sawiin mitin fimkhur turin a chah a. Mihring nunna hnar pawimawh tak ramngaw tichereu lova a humhalh hna thawktu Sawrkar Department hrang hrang-te hmalakna chu tha taka thlawp zel turin mipuite a sawm bawk. “Kangmei ven hi mi tin mawhphurna a ni” tih hria a tlawmngai pawl hrang hrangte, kangmei a chhuah changa a thelhtu Fire Department-te pui a an che chhuak thin chu fakawm a tih thu a sawi a. Ram kalsiam hna leh Sawrkar hmalakna engpawh hi a hlawhtlinna chu mipui tanrualna leh thawhhona ah a innghat a ni tiin Pu K. Laldawngliana chuan vawiina Fire Prevention Week hawnna a kalkhawmte hmaah fuihna thuchah a sawi.

Fire Prevention Week hmanna ah hian Pi Margaret Lalramchhani, IFS, DFO & Member Secretary, District Level Fire Prevention Committee chuan nikum lama kangmei chhuah dante leh a venhimna hna thawh a nih dan Report pein Mizoram pum hmun 4,486 ah kangmei chhuakin 14,153.08 Ha. a zau a kan thu leh chuta tang chuan hmun 205 (256,2.18 Ha.) a zau chu ramkang niin, hmun 4,281 (11,590.9 Ha.) a zau chu Lo hal, Bawlhhlawh hal leh thildang vang a kangmei chhuak a nih thu a tarlang a ni.

Kolasib District bikah chuan nikum khan hmun 361 (323.71 Ha.) a zau ah kangmei a chhuak a, hmun 352 (307.41 Ha.) chu Lo hal, Leipui hal, Huan hal leh thildang niin, hmun 9(16.3 Ha.) a zau chu ram kang a ni. Nikum chhungin Kolasib District-ah DFO leh Sub-Hqrs. YMA tang hovin mei kawng sial hnatlang neih a ni a. Rengtetlang atanga Bualpui inkara mei chhuah hlauhawmna laiah meikawng sial hnatlang neih a ni bawk. Meikawng hi Forest Range hrang hrangah Kilometre 10 sial a ni a, Controlled Burning (mei hal khalh) Range hrang hrangah kilometer 12 atan tih a ni bawk.

Vawiin a Fire Prevention Week hawnna hunah hian Kolasib khaw chhunga tlawmngai pawl hrang hrang aiawh leh Sawrkar Department houtute bakah thutharlakhawmte an tel a ni.