2420/2022-2023
25.10.2022: Champhai a cham mek Chief Minister Pu Zoramthanga chuan tukin khan Keilungliah Dam Reservoir hna kal lai mek chu tlawhin a enfiah.

Champhai khawpui kianga lui luang Keilungliah tuikhuah mek tlawhnaah hian Chief Minister hi Champhai North bialtu MLA Dr. ZR Thiamsanga, Vice Chairman, H&FW Board, Champhai DC Pu James Lalrinchhana leh SP Pu Lalrinpuia Varte te bakah department dang thawktu pawimawhte'n an tawiawm a. Tuikhuah siam hna thawktute nen inkawmin hmalaknate an sawiho a ni.

Keilungliah tuikhuah hi a project hming chu 'Dam Reservoir and Development of Recreation Centre at Keilungliah' tih niin, tunah hian hna thawktu contractor chu M/S S.S Construction an ni a. Non Lapsable Central Pool of Resources, NLCPR (DoNER) kaltlangin project man hi cheng nuai 1,988 niin, Concrete Gravity Dam leh approach road siamnate a keng tel a ni.

Tunah hian hna za zela 98 (98%) vel zo tawh anga chhut a ni a. Lui khuah san zawng hi metre 20 niin, a bulthut khuah chhah zawng hi metre 14 niin, zuih chho zelin a chhipah metre 4 a chhaha khuah a ni a, a sir tawn tawnah ke a kalna metre 1.50 a zaua siam a ni bawk a. A bulthut khuahna thui zawng hi metre 54.61 niin a chung lamah chuan metre 102.60 a ni a. Hnawm lut tur dan nan luite rawn pawhtuahte gabion structure siam tum a ni a. Irrigation pipe vuah a ni bawk. A panna kawng leh fankual velna tur kawng pawh ruahman tel a ni. Kum 2018 atanga bultan Keilungliah khuah hna March, 2020 a zawh tur ni mah se rokhawlhna a awm avangin hun tiam chhunga zawh hman a ni lova, kum hnih atan pawhsei leh a ni. Hun bituk chhung hian tuikhuah siamfel mai bakah hian project ken tel dangte pawh siam tel tum a ni.

Keilungliah tuikhuah chim chin zau zawng hi sq.m 84130.19 niin, tui litre 40,22,51,500 tling thei tura ruahman a ni a, a chim chin thui zawng hi metre 930 thleng ni tura ruahman a ni.

He tuikhuah hi Champhai khawpui tui mamawh leh thal laia kuthnathawktute tui mamawh phuhruk nan te, lenkhawthawnna leh khualhip nan te, sanghate khawia eizawnna tihhmasawnna nan te, khawpui timawitu leh sik leh sa tinuamtu atantea ruahman a ni a. Tuikhuah zawhfel anih hnua enkawl zui zelna tur leh Line Department kaltlanga hmalak theih dan turte pawh ngaihtuah chhoh mek zel a ni bawk.