2419/2022-2023

Khawzawl, the 25th October, 2022: Deputy Chief Minister Pu Tawnluia chuan nimin tlai khan Khawzawl District Volleyball Court hawnna leh District Volleyball Association Championship kharna hun khuallian niin a hmanpui.

He hun Khawzawl District Bawrhsap Pu C.C. Lalchhuangkima kaihhruaiah hian khuallian Pu Tawnluia chuan Khawzawl District chhunga infiammi ten Volleyball court tha zawk leh changkang zawk an neih theihna tura nasa taka rilru a sen thu leh a tak ngeia siam anih tak thu sawiin, Covid-19 hri leng avangin a hawnna neih theih anih loh hnuah Khawzawl District Volleyball Court hawnna neih theih a ni ta chu lawmawm a tih thu a sawi a. Volleyball Court awmna Khawzawl Dinthar Veng mipuite chuan a enkawl kawngah pawh mawhphurhna thui tak an neih thu a sawi a. Mizoramah hetiang Volleyball Court hi nei an la awm loh thu leh Khawzawl chu a nei hmasa ber an nih avangin hlawhtlinna ropui tak leh thil lawmawm tak a nih thu a sawi bawk.

Deputy Chief Minister chuan Khawzawl District-in infiamna lamah hma a sawn theihna atan hma lak mek anih thu sawiin, Sawrkar thar a pian ve leh Khawzawl Mualvawm field pawh phul lem phah tuma hmalak nghal anih thu leh tunah chuan hman theih a nih tawh thu a sawi a. Infiamna lamah District dang el pha  turin kawng hrang hrangah theihtawp chhuaha hmalak anih thu pawh a sawi bawk.

He hunah hian Horticulture Development Board Vice Chairman Prof. F.Lalnunmawia, Aizawl South III Bialtu MLA pawhin thu a sawi a. Volleyball Court tha tak Khawzawlin an nei chu a lawmpui thu a sawi a ni.

He hunah hian Pu Malsawmzuala, Jt. Director (A), UD&PA in technical report a pe a. Volleyball Court Artificial Turf hi Rs 32,15,000 senga phah a ni a, fencing tha tak siam a ni bawk. Pu Chanchinmawia, President KDVA in lawmthu a sawi a ni.

Khawzawl District Volleyball Association (KDVA) buatsaih, Inter District Volleyball Championship hi kar kal ta Thawhtanni atang khan khelh tan niin, mipa leh hmeichhia team 10 ve ve an tel a, nimin khan final khelh a ni a. Hmeichhe final-ah Neihdawn GSA leh Kawnzar GSA-I intumin Kawnzar GSA-I an champion a, Rs 7,000  bakah trophy leh certificate hlan an ni a, pahnihna Neihdawn GSA an ni a, Rs 4,000  bakah trophy leh certificate hlan an ni bawk. Mipa final-ah Hermon GSA leh Chawngtlai VC inkhelin Hermon GSA an champion a, Rs 10,000 bakah trophy leh certificate hlan niin, pahnihna Chawngtlai VC team te chu Rs 6,000 bakah trophy leh certificate hlan an ni bawk.