Vawiin khan Chief Minister Lal Thanhawla chuan Japan Sawrkar kaltlanga Japan International Cooperation Agency-in sum an thawh ah Mission Foundation Movement (MFM) in Khamranga Community Health Clinic an buatsaih chu hawng. Community Clinic hawnnaah hian Pi Lal Riliani; Parliamentary Secretary leh bialtu MLA ni bawk Pu Hmingdailova Khiangte; Embassy of Japan in India-a Economic Minister Pu Akio Isomata; Embassy-a First Secretary  Pu Kajuhisa Yoshida; Health & Family Welfare Department Principal Director Dr. K. Ropari; Kolasib DC Pu H. Lalengmawia leh SP Pu C. Lalzahngoa te an tel.

Chief Minister Pu Lal Thanhawla chuan India Sawrkar leh Mizoram Sawrkar chuan hmasawnna hrang hrang zingah hriselna, zirna leh hmasawnna ruhrel te chu a ngaihpawimawh bik anih thusawiin ram leh hnam kan intodelh dawn chuan taimak a ngai a, kan taimak dawn chuan hriselna tha kan neih a pawimawh ber a. Hriselna thuruk chu mahnia tan lak a, ei leh inah kan fimkhur a, zuk leh hmuam a kan fihlima kawng tin renga kan nun kan uluka kan fimkhur hi a ni, a ti a. Chutianga hriselna tha neia Community Health Clinic hi pan ngaia awm loin, an hriselna ngaipawimawh turin he hunah kalkhawm Khamrang mipuite te chu a chah a. Helai hmun hi fai taka vawng leh enkawl chu khawtlang mawh a ni a ti a. He Clinic sakna atan sum thawhtu Japan Sawrkar leh a buaipuitu leh enkawltu MFM chhunga lawmthu a sawi bawk.

NLUP chungchang sawiin Chief Minister chuan NLUP hian milian leh mi thil thei a zawng lova, kut hnathawkte, chumchhia te, mahni a inhlawh chawp te leh mi harsa te a zawnga, heng miten lei rem an rah a, khaw eng an hmuha, an mahni khaw buzawla ngei lungmuang taka eizawnna ngelnghet a nei a, mi hausa te hnuaia inhlawh a awm lova an mahni kut ke a dingchhuak turah puih chu NLUP ina a tum ber a ni, a ti a. A sawizel naah NLUP hi Pathianin mal a sawmin Pathian lam tang programme ani a, mahse a hlawhtlinna erawh a thawktu te kutah a awm a ni a ti.

 Tunlai khawvel sik leh sa inthlak danglam avanga global warming ah te hian NLUP hian pawimawhna a neih chhoh dante sawiin NLUP hi khawvel pawhin tha an tih avangin UNO lam pawhin an rawn ngaihven mai nilovin UN Agency pali lai telna chuan Aizawlah pisa an hawng a, TATA Trust te pawhin an rawn ngaihven a, Godrej company chuan oil palm herna te an bun a. Khawvela University tha a ngaih University of Minnesota hian NLUP zirchiang turin an rawn kal a, Mizoram University te nen thawhhona thuthlung te ziakin hma an la mek, a ni a ti a. NLUP dawngtu te chu zelthel lova hlawhtling turin rinawmna,dikna, taimakna leh Pathian tihna nung nen theitawp chhuah turin kalkhawmte a chah bawk a ni.

Japan mite chu khawvelah mi taima leh mahni hnaa inpe zo mi tia hriat an ni a, keini Ringtu leh Pathian nung bia te hi hnam zahawm, ropui leh intodelh turin malsawm tlaka kan awm leh kan nun a ngai a, chutiang turin Sawrkar chuan hma kan la in kawng hrang hrang tan ka la mek zelah mahse hetah hian Sawrkar leh mipui kan tan hoa kan inpuitawn a ngai a ni, a ti bawk Chief Minister chuan.  

Pu Hmingdailova Khiangte pawhin thu sawiin, Khamrang hi Damdawi In awmna atangin a hla a; he khua-ah hian Damdawi lam thiam an awm lo a; a chhehvela cheng ten an pan khawm thei bawk a; chuvangin mipui tan a tangkai dawn hle a ni a ti.

He hunah hian Pu Akio Isomata, Economic Minister, Embassy of Japan pawhin thu sawiin Japan Sawrkar hian Mizoram ah hmasawnna hna a thawk mek a; Aizawl atanga Tuipang inkar kawngpui siam nan te; Forest lam leh mihring thiamna chawisan nan sum tam tak a hmang mek a ni a ti.

Khamranga Community Health Clinic thar ah hian damlo te dahna tur Khum 4 leh hmanrua chi hrang hrang dah a ni nghal a. Damdawi lam thiam ten an awm chilh a. He Clinic ah hian damlo admit theih a ni a; Nauneih leh thisen test te; natna tlanglawn enkawlna tur dah a ni. Clinic building hi dung feet 52 leh a vang feet 39 a ni. Khamranga Clinic Centre sakna tur hian Japan chuan cheng Nuai 48.73 an pe a. MFM hian cheng Nuai 4.97 an thawh belh bawk.

Dr K Ropari Principal Director pawhin thu a sawi a. He hun hi Pu Andrew Lalherliana former MPSC Chairman in a kaihruai a ni.