Mizorama tuialhthei leh gas zawn hna kal mek zir chiang tura lo kal, Petroleum & Natural Gas Ministry-a Director (Exploration) Pu N. Srivastava leh a hote chuan nimin tlai khan Chief Minister Pu Lal Thanhawla chu a bangla-ah an hmu a. Tuialhthei leh gas zawn chhuah hna chak zawka kalpui dan tur an sawi ho.

PNG Director chuan Mizoram Chief Minister-in PNG Minister hnenah Mizoram dinhmun a hmun ngeia zir chiang tur lo tir tura a ngen avanga Mizorama lo kal an nih thu a sawi a. Harsatna hrang hrang awmte sut kian a nih theih nan Ministry chu a inhawng reng a ni, a ti.

Chief Minister chuan Mizoram chu tuialhthei leh gas-a a intodelh thuai theih nan theihtawp an chhuah thin thu sawiin, kan ram leilungin a zir loh avangin India ram hmun dangte aia harsatna kan tawh tam theih zawk thu a sawi a. Gas bottling plant lian zawk din a nih theih nan leh mipuite’n LPG connection tam zawk an hmuh theih nan Ministry-ah pawh a ngen tawh thu leh Mizoramin tuialhthei dah khawlna lian tak a mamawh thu a sawi a. Sawrkarin Hydrocarbon Vision 2030 thil tum tihlawhtling tura hma a lak tur thu a sawi bakah, a hlawhtlin theih nan ONGC, OIL leh IOC te chuan theihtawpa thawhpui turin a ngen nghal a ni.

Director hi Oil and Natural Gas Corporation (ONGC), Oil India Limited (OIL) leh Indian Oil Corporation (IOC) lam hotute’n an rawn tawiawm a. Anni hian an hnathawh kal mek dinhmun leh harsatna hrang hrang an tawh te, hma lak leh zel an tum dan te chu Chief Minister hnenah hian thlenin, theihtawp chhuaha a tanpui thin avangin lawm thu an hrilh a. Chief Minister chuan harsatna an neihte chu a hnena thlen zel tura chahin, a theih ang anga anmahni tanpui leh thawhpui zui zel a lo tiam a ni.

IOC hotute chuan Mizoramah gas connection tam zawk an rawn pek belh thuai tur thu sawiin, hnianghnar zawka Mizoramin tuialhthei a dawn theih nana hma an lak mek thu an sawi a. ONGC leh OIL lam pawhin Mizoramah chuan tuialhthei leh gas a awm ngeia an rin ngheh tlat thu sawiin, a hlawhtlinna hmu tur erawh chuan hun a la duh deuh tur thu an sawi a. Chhim lama oil leh gas zawn hna pawh tun thla thum chhung hian thawh hman an tum thu an sawi bawk.

ONGC hian Meidum leh Zanlawn-ah lei verh hna hi an zo tawh a; Meidum-ah hian gas deposit eng emaw zat hmu tawhin, Hortoki lamah pawh hma lak an tum mek a. OIL hian hmun 5-ah leiverh an nei tawh a; tunah hian Keifang-ah lei an verh leh mek bawk a ni.