India ram chhung khaw fai thlanchhuahte hnena pek thin Nirmal Gram Puraskar Award chu vawiin khan Chief Minister Pu Lal Thanhawla'n khawfai 5 thlanchhuahte hnenah a hlan. Khaw fai lawmman dawngtu khuate chu Bawngthah, Hliappui, Lallen, Phulmawi leh Zawlnuam Thuampui te an ni.

Public Health Engineering (PHE) Department bultuma khaw fai lawmman semna inkhawm Aizawl Vanapa Hall a buatsaihah khuallian Pu Lal Thanhawla chuan  khawfai lawmman dawngtute chu fakawm a tih thu sawiin chawimawina an dawn chu anmahni tiphurtu leh titangtu, a la dawng velo khuate tan a dawn ve ngei duhna thinlung cho chhuaktu leh kartu a nih ngei a beisei thu a sawi a. Chawimawina dawngtu khuate a lawmpui rualin tang sauh sauh turin a fuih a, naupang ten faina hlutzia an thanlenpuia, an vawn tlat theihna tura zirtirna pe thin turin a fuih a ni. Chief Minister chuan Mizoramin faina kawnga hma a sawn theih nana tan latu PHE Department leh UD &PA Department hmalakna te chu fakawm a tih thu tarlangin zir tur erawh Mizoram mipui ten kan la ngah hle a ni, a ti a. Fai leh thianghlim hi Pathian hnaihna a nih avangin Mizo ringtu za a za inti ngamte hi chu mi dang zawng aiin kan thianghlim tur a ni, a ti. Hnam changkang, fing leh hmasawn ni tur chuan fai a tul hmasa a, Aizawl khawchhung a kawthler, kalkawngsir, tuiluankawr ah te leh Office leh damdawi in step leh bang vela kuhva khawr ei te chinai tah leh chil chhak sen nguai hmuh tur la tam zia en hian Mizoten faina kawngah zir tur kan la ngahzia a tilang chiang hle a. Ram leilung fate chuan thahnemngaihna nen, neitu thinlung pu in faina leh thianghlimna kawngah rilru thar kan put a tul takzet a ni,  ti a. Intodelh tur chuan taimak a tul a, taima tur chuan hrisel a tul avangin thianghlim leh fai a pawimawh a, zuk leh hmuam, zu leh sa ah te insumtheih a tul takzet a ni, Chief Minister chuan a ti bawk.

He huna khualzahawm PHE changtu Parliamentary Secretary Pu H. Zothangliana pawhin thu sawiin PHE Department hmalakna kawng hrang hrang a tarlang a. Thianghlim tur chuan mitin ten hnianghnara tui thianghlim in tur neih hi a pawimawh avangin sorkar chuan hemi kawngah nasa takin tan a la a ni, a ti. Pu H. Zothangliana hian PHE Deparment in kawng hrang hrang a hma a lak dan lantirna Documentary Film a tlangzarh nghal bawk.

Nirmal Gram Puraskar (NGP) Award hi Total Sanitation Campaign hnuaia hnathawh dan teh nan te, faina lama khaw hrang hrang ten tan an lakna tura inelna atan kum 2005 atang khan India ram President-in kum tin lawmman a hlan thin a. Lawmman hi mihring tam dan a zirin hetiang hian pek a ni.

Mihring 1000 aia tlemah - Rs 50,000/-
Mihring 1000-1999 inkarah - Rs 1,00,000/-
Mihring 2000-4999 inkarah - Rs 2,00,000/-
Mihring 5000-9999 inkarah - Rs 4,00,000/-
Mihring 10000 chunglamah - Rs 5,00,000/-

A dawn theih dan chu - Khuaa in zawng zawngin inthiarna tha- ekin leh zunin an neih vekin, Zirna in - School leh Anganwadi-ah te in thiarna tha a awm vekin, Vantlang hmunah inthiarna tha a awmin, Khawlai leh daiah ek awm lo leh Khawtlang en mai pawh a a faiin he lawmman, Nirmal Gram Puraskar Award hi dawn theih a ni.

Award semna inkhawmah hian PHE Special Secretary Dr. Dilraj Kaur IAS chu Chairperson a ni a, Jt. Secretary (Tech) Er C Lallunghnema'n Report a pe a, kumina khawfai lawmman dawngtu leh kum hmasa lama dawngtu aiawhten thusawina hun an hmang bawk. He inkhawmah hian Minister Pu H. Rohluna, Mizoram Law Commission Chairman Pu R. Lalrinawma leh ZIDCO Chairman Pu V.L. Robiaka te pawh an tel a ni.